Activista local ta pidi van Huffelen interveni y actua den caso Parkietenbos

ORANJESTAD – Den un carta dirigi na secretario di estado Hulandes Alexandra Van Huffelen, conocido hurista y activista local Anouk Balentina a pidi e mandatario Hulandes pa interveni den e asunto y pa haci un investigacion mas leu. E carta, fecha 3 di juli 2023,  tabata pa e mandatario Hulandes bishita e sitio un biaha mas durante su bishita recien di un dia, pa trata e asunto di e maneho di desperdicio, y e ‘derecho riba bida y airea fresco’. Balentina ta bisa cu tur loke cu gobierno ta haciendo riba e tematica aki, ta nada mas cu un façada traha, yena cu declaracionan positivo, siendo cu e realidad no ta nada menos cu e situacion prome cu e ciere di e dump, sino den hopi aspecto, hasta pior.  E sitio, segun Balentina, ta mustra bon, drecha perfectamente bon pero ta meramente un cortina di huma pa tapa e berdad dificil pa e mandatario. Cualkier intento pa sana e situacion, ta otro y ta splica e loke cu segun e activista, gobierno ta haciendo realmente. “Como secretario di estado cu corectamente ta preocupa su mes cu e protection di e supervision financiero y derecho di e ilegalnan na Aruba, mi ta urgi bo pa e mesun forma di preocupacion y atencion pa e derecho di e habitantenan di Parkietenbos” e activista ta sigui bisa. E ta relata su situacion personal y di su famia bibando como habitante di Parkietenbos y kico tur nan ta experenciando cu nan salud. E ta papia di e accionan cu e la tuma den direccion di gobierno y e falta di atencion cu e ta hayando y cu esaki ta desemboca den casonan legal contra gobierno. Un preocupacion mas di Balentina ta cu Aruba ainda no tin norma legal pa medio ambiente y esaki so caba lo ta empugna cu e tratado Europeo pa derecho di hende, cu ta conta pa Aruba tambe. E ta mustra con otro islanan di Reino si a tuma paso proactivo pa remedia cierto situacionan na p.e. St Maarten. E hecho tambe cu segun Balentina, Aruba ta rechasa cualkier ayudo professional di Hulanda y ta prefera pa reparti e tareanan entre famia y amigonan, sin cu tin cualkier expertisio. Na final di su carta di 5 pagina, e ta suplica e mandatario pa papia cu gobierno di Aruba riba e tema aki y pa pone nan bou di presion. “Bo ayudo y intervencion ta necesario pa por actua mas fuerte u real. Bo participacion por haci un diferencia crucial” Balentina ta finalisa bisando. Noticiacla a ricibi tambe un confirmacion di BZK cu e carta a keda ricibi pa e mandatario Hulandes. Pa lesa e carta completo di Balentina, click AKI.