Natura: No ta destruyendo naturalesa, pero e paro pa traha beach ta perhudica e hotel si

ORANJESTAD – E compania responsabel pa desaroyo di e hotel Embassy Suites, esta Natura Development NV a sigura cu no ta destruyendo naturalesa cu trahamento di un beach artificial dilanti e hotel, pero e paro pa traha beach ta perhudica e hotel si financieramente. Ademas e compania no ta di acuerdo cu mester di un exoneracion pa por desaroya e beach artificial dilanti e hotel Ademas e no ta haya cu e fundacion Aruba Birdlife Conservation ta admisibel pa dicidi si nan (Natura) por traha e beach of no. Esey tabata parti di e defensa di e tres abogadonan cu a defende e compania diabierna mainta den corte den e caso sumario cu ABC a entama contra Natura. 

KICO A PASA

Segun abogadonan di Natura, tabata na 2018 cu a pidi un permiso pa traha e beach y un tunnel pa e hotel en cuestion. Despues di un tempo cortico, a bin compronde cu a haya e permiso pa haci tal. Riba e argumento cu e compania ta destruyendo naturalesa door di kita e yerba Caña, esaki no ta berdad. A argumenta cu ta meramente re-aloca e yerba y no ta destruyendo esaki. Y den cuadro di esaki, no ta necesario pa tin un asina yama exoneracion. A admiti cu no a pidi un exoneracion, osea un ontheffing y tampoco a haya esaki. Pero cu si resulta cu mester di un exoneracion, lo haci e peticion y tanten, lo no haci ningun trabou pa cu esaki. Un di e abogadonan en cuestion Ronny Wix a sigura huez cu ta un asunto entre gobierno di Aruba y Natura pa detemina esey y no ta na lugar di ABC pa bringa esaki. Nan (esta ABC) ta pa bringa pa naturalesa, pero nan (Natura) no ta destruyendo esaki. Aki huez a puntra e partidonan con por impone un prohibicion na un compania cu ta trahando riba un tereno cu no ta di nan sino gobierno y cu ta pues gobierno mester ta esun cu ta prohibiendo esaki y no ABC. Abogado Wix a sigura cu e discusion si mester di ontheffing of no, ta ‘andando ainda’. 

RECHASA TUR COS

E abogado principal di Natura, sra Gwendeline Croes, a cuminsa nab isa cu e ta rechasa tur ponencia di ABC. A splica cu Natura a cuminsa cu e proyecto finalmente na 2018 trahando 330 suites y un beach. A manda un peticion na minister cu e tempo ey a bay di acuerdo na juli di e aña ey. E peticion pa un brug tabata un otro carta pa cual tambe a haya permiso. Pero despues a bin e crisis di corona na 2020 cu a para tur cos. Cos a empeora cu a pone cu e compania mester a pasa pa un proceso di refinanciamento. Esaki a keda logra cu cierto condicion, pero cual aworaki ta keda afecta pa e proyecto di e beach. Debi na tur problema, a keda cla te na 2023 pa habri e hotel 4 luna pasa, y ta apenas e aña aki a cuminsa cu e proyecto di e beach. Tabatin un discusion cu autoridadnan competente dia 26 di aprol unda cu a trata e drechamento di e area y expansion di e beach. Despues cu a haya aprobacion di DOW, a cuminsa cu e construccion di e beach artificial. A mustra cu si tin aprobacion di minister pa loke ta e verkavelingsplan, no tabatin mester di permiso manera cu ABC ta sigura. Despues a sigui un reunion dia 12 di juni ultimo unda cu tabatin un discusion interno entre Directie Natuur & Milieu  y DOW si tabatin mester di un permiso special pa e beach. Contrario na ABC cu ta alega cu a traha basta riba e beach, Natura a sigura cu a cuminsa apenas dia 21 di juni y a haya e paro dia 23, esta dos dia despues. Ademas, abogado a alega cu contrario an ponencia di ABC, no ta asina cu e compania, cueste loke cueste, lo mester a traha un beach. Pa loke ta e video cu ABC a mustra pa splica huez di e situacion, abogado Croes a alega cu nan (ABC) a presenta un imagen distorciona di e situacion y a mustra nan propio video pa mustra segun nan, loke tabata e situacion real di e yerba eynan y cu ningun momento a causa destruccion. Ora cu a para e trabou dia 21, a sigui un dia despues bou di supervision di tanto DOW como DNM ora cu nan a keda sorprendi dia 23 cu e medida di orden temporal pa para tur cos. Ademas a bolbe subraya cu ningun momento a daña naturalesa manera cu ABC a alega. A mustra cu netamente e yerba di caña, ta un bon yerba cu ta crece facil y pega facil, y su realocacion tabata e miho forma di presenta esaki. Ademas abogado Wix a cay aden, mustrando cu si mira un bista aereo di e sitio, cu henter e strip di beach, por mira e tipo di yerba aki cu constantemente ta haya trabou di renobacion di beach y cu esaki nunca a afecta e bira marino manera cu ABC ta pretende. 

DAÑO FINANCIERO

E abogadonan a alega cu e paro di trabou ta causando daño financiero na e hotel, ya cu basa riba e refinanciamento y e fayo na e tempo cu ta tumando, esaki lo causa e compania miyones extra pa aña na interes acumula (a haci mencion di e suma di 3.7 miyon florin pa aña conforme e refinanciamento pa e proyecto). Ademas, debi cu e hotel no por ofrece e beach ainda, e ta hayando hopi cancelacion desde cu nan a habri porta 4 luna pasa, pasobra no por bende e hotel como un ‘beachside’ hotel, esta un hotel cu tin un beach. 

POSICION HURIDICO

Segun e abogadonan di Natura, no ta na ABC pa determina si Natura mester di un exoneracion, osea ontheffing of no. Ademas e alegacion di ABC pa mantene e medida di para construccion te ora cu tin un caso di profundidad pa trata e tema (bodemprocedure), no por pasobra no tin ningun indicacion cu ABC lo enberdad cuminsa un caso di profundidad. A sigura cu si resulta cu mester di un ontheffing, lo pidi esaki. Ademas a presenta un obhecion contra e multa y e aumento di esaki. Sinembargo manera ta conoci awor, huez a rechasa e obhecion y a aumenta e multa na un miyon florin pa dia. Huez a cera e tratamento y ta dicta sentencia dia 2 di augustus proximo.