Huez a aumenta suma di multa pa Natura Development cu mei miyon si viola orden temporal pa no traha beach

ORANJESTAD – Corte diabierna atardi a aumenta e multa pa e compania Natura Development si e viola e medida di orden temporal pa no traha riba e beach dilanti Embassy Suites, cu mei miyon, na un miyon florin pa dia, si e viola e medida di orden actual. E caso sumario mes a tuma lugar diabierna mainta unda cu fuera di trata e caso, e fundacion cu a entama e caso, esta Aruba Birdlife Conservation (ABC) a pidi huez adicional pa aumenta e multa inicial impone dia 23 di juni ora cu huez a impone e medida di orden temporal. E multa inicial tabata figura na mei miyon florin. Awe tardi huez a dicta cu e ta bay di acuerdo cu ABC, y ta aumenta e multa te na 1 miyon florin pa cada dia cu Natura Development viola esaki. Segun ABC, tabata necesario pa esaki debi cu nan no ta confia cu e contra partido lo respeta e decision aki mirando nan actitud cu nan a bin ta desplega despues di a tuma nota di e multa imponi. Mester bisa cu durante e caso, Natura Development a purba desbarata e ponencia ey y a bisa cu ningun momento nan tabatin intencion di viola e medida di orden temporal. Keda pendiente pa relato di e caso mes cu a tuma lugar awe mainta.