Ministerio Publico a confirma cu lo persigui ex minister Oduber den caso Flamingo

ORANJESTAD – Un dia despues cu ex minister Otmar Oduber a bin cu un conferencia di prensa pa informa riba e email cu e la ricibi di Ministerio Publico pa un possible citacion pa e caso Flamingo, OM mes a confirma diabierna cu e la dicidi enberdad pa persigui sospechosonan den e caso Flamingo. Contrario na sr Oduber cu ta considera esaki como Flamingo 3 ya cu e otronan no tey mas (pa loke ta contenido), OM si ta yama e caso simplemente caso Flamingo.  

KICO E CASO TA

Segun OM, e investigacion Flamino tin -en breve- di haber cu practicanan fraudulento tempo ex-minister Otmar Oduber tabata minister di Ruimtelijke Ontwikkeling, Infrastructura y Medio Ambiente durante e periodo di november 2017 te december 2019. 

PERSIGUI VARIOS PERSONA

Ademas OM a sigura cu nan ta persigui no solamente Otmar Oduber pero 7 persona mas cual tur lo haya un citacion proximamente. “Ministerio Publico tin planea pa cita 8 sospechoso, entre nan e ex-minister” OM ta bisa textualmente.

E hechonan castigable cu lo wordo persigui ta estafa, maluso di poder, corupcion (activo y pasivo) y falsificacion. OM ta mustra tambe cu Corte den Prome Instancia a wordo poni na haltura di e intencion pa cita e sospechosonan aki.