Gabinete Rutte ta na bida ‘ainda’ y combersacion ta sigui awe riba asunto di asilo

DEN HAAG – E negosacion di crisis entre partidonan di coalicion Hulandes VVD, D66, CDA y ChristenUnie riba un limitacion di e cantidad di asilo cu e pais por acepta, ta sigui awe tardi ora di Hulanda. Tur wowo ta riba e tarea cu secretario di estado van den Burg a haya. E mester inventa un compromiso cu ChristenUnie por bay di acuerdo cu ne. Si partidonan no haya otro, esaki por nifica caida di e gabinete Rutte 4. Te cu ayera ainda, VVD y ChristenUnie tabata para liña recta contra otro. E culpable lo tabata premier Mark Rutte cu lo a bin cu exigencianan inaceptabel cu ChristenUnie dificilmente por a bay di acuerdo cu ne. Esey a causa un ambiente di crisis. Segun fuentenan yega na e combersacionan ayera nochi, Rutte mientrastanto a pidi disculpa pa su powerplay, cu a saca e tension for di aire y cu a pone cu e combersacionan por a cana mas miho. Pero e problema ta sigui keto bay, cu ta nifica cu gobierno ta un pia pa tera uno pa laman ainda.