Otmar Oduber ta cla pa bringa su caso, awor cu OM kier persigui’e formalmente

ORANJESTAD – Ex politico y comerciante Otmar Oduber diahuebs mainta a anuncia cu e ta cla pa bringa Ministerio Publico (OM) awor cu e la ricibi un email di e instituto ey, informando e cu e ta bay haya un citacion osea ‘dagvaarding’ porfin pa tratamento di e caso conoci como Flamingo. Segun sr Oduber, di tur loke nan tabata acuse tur e tempo pa cu e caso, a keda apenas 3 acusacion cu e ta considera como ‘fofo’ pero cu OM ta haya suficiente pa persigui Oduber p’e. Ministerio Publico di otro banda, no a confirma publicamente (ainda) cu nan lo persigui Oduber, y un intento di noticiacla pa haya un confirmacion di OM riba esaki, no a duna resultado ainda. Ta normal cu ora cu OM inicia un caso asina, nan ta haci e anuncio publicamente. Algo cu awor (ainda) no a tuma lugar. 

DAGVAARDING

Di loke por a compronde di sr Oduber, esaki por bien ta pasobra oficialmente ainda e no a ricibi e dagvaarding, esta cu OM no a haci e anuncio publico ainda. Loke e la haya (via su abogado), ta un email di OM cu e anuncio di e intencion pa dagvaard e pa e caso. Segun Oduber, mientras cu OM ta purbando pa hay’e pa yuda OM cu e caso, e unico cos cu e mes a pidi OM, ta pa un documento cu ta e asina yama ‘kennisgeving niet verder vervolging’ pues oficialmente un notificacion cu no ta persigui’e mas legalmente. Pero esaki OM no kier a dun’e y cu segun Oduber, Fiscal lo a bisa pa warda un rato riba esey. OM lo kier  a duna Otmar e dossier en cuestion pa ‘negosha’ cune. Segun Oduber, OM lo tabata kier pa Oduber mes traha un rapport cu tur e informacion pa asina por dicidi mas facil riba su caso, osea pa Oduber haci e trabou di OM. Segun Oduber, OM ta bisa cu abogado di dje a nenga tuma dossier.. Esey Oduber ta admiti. ‘“Of bo ta hibami corte, of bo ta bisami cos a pasa”, e la sigui splica.

E LIÑA DI TEMPO

Segun Oduber, tres aña pasa nan a haci huiszoeking na su cas, pa despues un aña y un luna despues e keda deteni y encarcela na KIA pa 23 dia. E December cu a pasa, (2022) e investigacion a keda conclui. Y Januari ultimo e rapport lo a keda cla segun Oduber a bisa diahuebs den e conferencia di prensa. Y awor esaki ta culmina cu un email cu ta anuncia cu e lo haya e dagvaarding proximamente. Pero mirando e timeline, y cu tin recess na caminda, e ta premira cu lo dura por lo menos te October prome cu e haya sa ki dia e caso por bin dilanti. 

E ACUSACIONNAN

Segun Oduber, tin tres acusacion so cu a keda vigente pa cual OM kier persigui’e. E prome ta trata e caso Malmok, unda cu supuestamente e lo a regla tereno na 2 persona, pero unda cu e mes no ta e acusado principal, sino ta envolvi den forma di cooperacion di esaki esta ‘medepleging’ . Segun OM, e lo a desvia di e maneho di duna tereno, y cu e lo a privilegia e personanan aki mientras cu no tabata nan turno. Un otro acusacion tabata di e caso Ambtenaar Spirito, esta cu e lo a duna trabou na hendenan den gobierno sin cu nan tabata presenta na trabou. Entre nan cu tabatin 5 acusacion cu tabatin periodista riba su payroll, sin cu nan tabatin contract. Segun Oduber, di e cinco nan, ta un acusacion so a keda para y ta algo cu awor ex colega Marisol Lopez Tromp lo a acus’e di dje, despues cu e mes a wordo retira, y no durante e momento cu e tabata sinta como minister. E di tres acusacion ta trata di e caso ‘Esser’ cu ta un persona cu lo tabata traha cu Oduber y cu tambe a wordo scucha despues cu nan a detene y unda cu na 2020 a haci un inval na su cas tambe. Aki Oduber ta wordo acusa atrobe di a coopera (medepleging) y malusa su funcion pa duna cantidad di hende trabou, entre nan 1 na DOW, 4 na DIP y 4 na Serlimar. Segun Oduber, OM ta pensa cu a registra nan como votador di su ex partido POR, unda cu lo tabata privilegia esnan cu tabata liga na partido, cu trabou, y cu e cargo ta medepleging door pasief steunen in politieke cariere. Algo cu no por pasobra e no tabata ni politico mas. A sigura cu di e 4 hendenan na DIP, 3 tabata ambtenaar. Y segun OM, pasobra 2 di nan tabata candidato di POR, y e otro por a yuda POR door di ubica nan strategicamente eynan pa yuda Oduber. 

DEFENSA DI ODUBER

Segun Oduber, e ta considera e caso awor como Flamingo 3, pasobra mirando tur loke e la wordo acusa di dje anteriormente cu loke a sali di e investigacionan anterior, 100% di loke nan (OM) a yama inicialmente Flamingo, no ta aparece den e dagvaarding. A mustra cu den e email di OM, lo a priminti cu prome cu recess di Corte, lo duna resultado di e caso. 

TA BAY ALL OUT E BIAHA AKI

Oduber a sigura cu mirando kico ta pasando, su abogado Vito Carlo lo defende den corte, pero e mes lo defende su mes publicamente. Y unavez cu e haya e dagvaarding, e lo habri contra tur esnan envolvi tanto den OM, polis como Landsrecherche y lo bay menciona tur number di tur hende publicamente y tene nan tur responsabel pa a traha raport falso contra dje, pasobra segun Oduber, e tipo di cosnan aki tin cu stop. Y segun Oduber, esaki ta e unico forma, door di desenmascara e hendenan aki, cuminsando den OM, sigui pa Landsrecherche, RST y tambe polis. Pues por spera cu e lo cuminsa menciona nomber di personanan envolvi asina cu e dagvaarding bira publico. E la priminti prensa tambe cu e lo comparti tur documento, mirando cu tur cos lo ta digital. E la mustra cu cosnan cu ta tumando lugar na Aruba unda cu ta tira nomber di comerciantenan grandi, politico y mas, manera ta coi hunga esaki ta. E lo persigui cada uno civilrechterlijk, pasobra “esaki tin cu caba. Bo no por caba cu un hende su bida, mentalmente, comercialmente, emocionalmente”. Y esaki segun Oduber, tin cu stop na Aruba. Pa Oduber, por conta cu lo bin cu un caso di daño y perhuicio pa drecha su nomber aunke cu e la perde tur loke e por a perde caba. 

ARUBA BANK

Y na fin, e la manda un mensahe pa e instituto financiero Aruba Bank, cu segun Oduber tabata e motibo cu su negoshi a kibra. E ta mustra cu e mester a hiba e banco corte pa por a habri un cuenta bancario, pero cu despues e banco a opta pa apela. Pero ta bay haci 24 luna (esta dos aña) cu nan ta blo pospone e sentencia. “E pregunta ta, bo ta bay sigui”, Oduber a puntra, dirigiendo su mes na e banco. Segun Oduber e ta bay responsabilisa hendenan di e banco y aki si ta papia di daño y perhuicio cu lo ta den miyones pasobra aki si tabatin hopi placa den wega.