Plasterk: E acuerdo mester conduci na finanzas publico sano

DEN HAAG – “E (acuerdo) mester conduci na finanzas publico sano y reduccion di debe di Aruba”. Esaki minister hulandes encarga cu Reino, Ronald Plasterk a bisa NoticiaCla.com awe mainta como prome reaccion riba e acuerdo firma den fin di siman. “Mi ta contento cu e acuerdo” e mandatario a sigui bisa.

HAYA OTRO

E mandatario ta confirma cu nan a ‘haya otro riba e supervision financiero independiente, cu instalacion di e College Aruba Financieel Toezicht’, e mandatario a sigui bisa. E mandatario ta sigui bisa cu enberdad e ta haya cu e asunto a dura largo. “Pero e ta bay riba e resultado”. Asina e mandatario ta sigui bisa awe mainta.

OTRO PREGUNTANAN

Otro preguntanan haci, mester a warda te ora cu e manda e carta riba e acuerdo, pa Tweede Kamer. E ora e otro preguntanan haci, por haya contesta. “Mi ta spera cu esey por sosode awe ainda” e mandatario a sigui bisa. Preguntanan manera kico ta pasa cu e recomendacionan cu e CFT actual basa na Corsou a duna relaciona cu e presupuesto 2015. Si nan ta wordo bari for di mesa. Otro pregunta cu tambe ta haya contesta, ta si e conseho di e CAFT ta 'bindend', of ta keda meramente un 'conseho'. Den curso di dia, lo haya claridad riba esaki. 

ACUERDO FIRMA

Manera cu NoticiaCla.com a raporta caba den fin di siman, entrante 1 di juli proximo, Aruba lo conoce su propio CFT, mas concreto, un College Aruba Financieel Toezicht (CAFT) cu lo supervisa e situacion financiero di pais Aruba. Diadomingo atardi, gobierno di Aruba y Hulanda a emiti un comunicado cu ta splica kico a sosode, -den liña grandi-, diasabra y kico e acuerdo ta ensera. E base ta e constelacion di e comision (di tres persona), e fecha cu esaki ta cuminsa, y cu e ta termina den un asina yama ‘begrotingskamer’ unabes cu Aruba yega su meta di tin un presupuesto duradero balansa. Ambos parlamento lo wordo informa di esaki den e dianan cu ta bin. Segun e version oficial di gobiernonan di Aruba y Hulanda, "diasabra ultimo gobierno di Aruba y Hulanda a yega na un acuerdo pa un supervision financiero independiente, pa cuida e palabracionnan anteriormente haci y e palabracion di mas aña. E esfuersonan aki ta dirigi pa yega na un presupuesto duradero y balansa y conduci na estimacionan prulianual (meerjarenraming).

JULI

Entrante 1 di juli, un College Aruba Financieel Toezicht lo ehecuta supervision independiente riba normanan stipula y palabra. E college lo consisti di un miembro di Aruba, uno di Reino Hulandes y uno di Hulanda. Unabes cu Aruba alcansa un presupuesto balansa duradero, un asina yama ‘begrotingskamer’ lo wordo institui, cu ayudo di Hulanda. Gobierno di Aruba lo presenta un concepto di ley, cu ta regla e supervision structural aki. Cu e acuerdo aki tambe ta bin un fin na un trayecto largo di negoshacion riba e formulacion di un supervision dirigi riba finanzas duradero pa Aruba.

PANAMA

Tabata na Panama, cu durante discusion entre premiernan Rutte y Eman recientemente, a conduci na un bon base di confiansa pa por a yega na e resultado aki. Den cuadro di esaki, gobierno di Aruba y Hulanda despues di e reunion di Conseho di Minister di Reino di 24 di april ultimo, a continua cu e combersacionnan aki y cu por a trece, hunto cu Plasterk, un proposicion alternativa. Tanto premier Mike Eman como minister Ronald Plasterk tabata hopi contento cu e resultado. Ambos pais lo informa nan respectivo parlamentonan riba e acuerdonan logra.". Te aki e acuerdo textual

Lesa e texto original na hulandes aki