Gobierno a priminti parlamentario di Raiz cu lo cumpli cu su peticion y asina a haya su voto

ORANJESTAD – Gobierno a priminti parlamentario di RAIZ Misha Raymond cu su peticion pa inclui logopedie den e pakete basico di AZV, lo keda cla pa 1 di augustus proximo. Cu esaki, Raymond por a keda trankil y cu coalicion por a conta cu su voto pa e ley di cobransa di BBO na frontera. Tabata na comienso di e tratamento di e ley, cu Raymond a sorprende tur hende cu su declaracion cu si gobierno no cambia e ley di inclui logopedie den e pakete basico di AZV, cu e no ta vota pro pa e ley di BBO na frontera. E la argumenta cu aña pasa e la entrega e mocion y cada bez tabata manda carta di recordatorio, pero cos no tabata cana. E la bisa e ora cu no por tin solamente votamento riba welvaart sino tambe riba welzijn. Sin e voto di Raymond, por a causa un problema pasobra e ora lo no tabatin suficiente voto pa pasa e ley, mirando cu coalicion lo tabatin solamente 10 voto. Pero na final prome minister Evelyn Wever a contesta Raymond cu e ley ta canando su caminda y cu pa 1 di augustus proximo e ley lo keda cla.