Avionnan na caminda pa Hulanda cu victimanan di buelo fatal MH17

EINDHOVEN– E avionnan cu curpanan di e victimanan hulandes di e buelo fatal  MN17 di Malaysia Airlines, ta na caminda pa Hulanda diaranson mainta. Nan a lanta buelo 11’or ora local di Hulanda y lo yega nan destino pa 4’or di atardi, ora di Hulanda. Despues di un ceremonia chikito, e prome avion a lanta buelo cu 16 caha cu e curpanan.

Hulanda a decreta dia nacional di luto pa diaranson. Esaki ta relaciona cu e yegada di e prome dos avionnan Hercules cu tin cu transporta curpanan di esnan cu a fayece den e accidente aereo di Malasia Airlines siman pasa. E anuncio a wordo haci pa premier hulandes Mark Rutte diamars den curso di dia. Rey Willem Alexander y Reina Maxima hunto cu Rutte y vice premier Asscher lo ta presente tambe. Ora e avion yega, lo tene un minuut di silencio y banderanan di hulanda lo ta halfstok 5 minuut prome cu e avionnan aterisa. NoticiaCla a compronde cu ta prome biaha cu Hulanda ta tene un dia nacional di luto desde 1962.