Adelizah Vrolijk ta bira e di cinco morto di trafico pa 2023

ORANJESTAD – Diaranson merdia a drenta e tristo noticia cu e victima di accidente di trafico di diadomingo marduga, a fayece y bira e di 5 morto di trafico pa 2023. Ta trata di e dama Adelizah Vrolijk (37) miho conoci como Liza. Tabata diadomingo madruga dia 2 di juli, despues di 1’or am cu central di polis a wordo notifica di un accidente frontal na altura di Sonrisa na Pavia. 

Na yegada di patruya a bin encontra cu dos auto cu a dal frontal den otro.  Ambos chauffeur di tur dos auto tabata den estado critico. Patruya a pidi pa ambulance cu maximo urgencia e momento ey. Na e sitio di e sucedido a presenta ambulance, rapid responder como tambe brandweer. Na yegada di ambulance a stabilisa ambos chauffeur y a bay cu ambos chauffeur cu maximo urgencia pa hospital. Polis di trafico como tambe polis technico a presenta na e sitio pa haci nan investigacion. For di momento di e accidente sinembargo, tabata conoci cu e situacion di un di e personanan no tabata bayendo bon cu su salud. Y lamentablemente e confirmacion a drenta diaranson cu pa 12:18pm di merdia,  Dr.Vera a constata morto di Adelizah Sherrylane Richanella Vrolijk, cu diasabra awor, lo mester a cumpli 38 aña. Slachtofferhulp tambe a presenta na e hospital pa brinda sosten na famia di e fayecida.  Lisa ta yiu di conocido fotografo den prensa Anselmo Vrolijk miho conoci como Leo y Adeline Vrolijk miho conoci como Shelly, y ta ruman di conocido anchor di Telearuba Andrew Vrolijk y ruman Jeremy. Noticiacla y Cuerpo Policial ta manda palabra di profundo condolencia y forsa na famia di e fayecida.