Na Corsou, parlamentario Braam no a keda condena segun Ley di integridad pues e por bira minister

WILLEMSTAD - Ayera korte di Apelashon a dikta ku e aktual parlamentario Eduard Braam no a keda kondená segun artíkulo 7 di e Lei di reglanan di integridat pa kandidatonan minister. Esaki ta hasi ku Braam por bira minister.

Dia 7 febrüari 2022, Braam a pèrdè un kaso ku el a entamá kontra di gobièrnu, pero pa ta eksakto kontra di formadó di gobièrnu, pasobra a bis’é ku e no por bira minister, debí ku e tin un sentensia di pasado pa akto di inmoral. Braam no a aseptá e sentensia, i a apelá dia 21 di mart 2022.

Manera ta konosí despues di elekshon di Staten na mart 2021, Braam a keda presentá na formadó dor di MFK komo kandidato pa e ministerio di hustisia. Despues di un investigashon hudisial dor di Prokurador General, Braam a hala atras komo kandidato pa minister. Tur hende por kòrda kon despues ku gobernadó sra. Lucille George-Wout a manda yama sr. Braam, el a disidí hala den su kandidatura, i a entamá kaso kontra di formadó.

Un dje demandanan di Braam ta ku e no a keda kondená segun artíkulo 7 di e lei ku ta kontené reglanan pa integridat di kandidatonan pa minister. Ayera el a haña rason den Korte di Apelashon riba e artíkulo aki.

Korte di Apelashon a bai evaluá e dos palabranan “kondenado” i “sospechoso” den terminologia di e lei di nos kódigo penal. Esaki ta indiká ku asina un sospechoso haña un kondena ta papia di “e kondenado”. For di ora ku un wes penal diktá un kastigu e sospechoso ta bira un kondenado.

Den kaso di Eduard Braam, e no a haña un kondena. Den terminologia di e buki di Kódigo penal i “strafkamer” di Hoge Raad pues e no a keda kondena, hasta si un deklarashon di “probá” keda hasi i ku e loke a keda proba keda deklará komo algu kastigabel i si Braam keda deklará kastigabel p’e echo probá.

Mas aleu e tres wesnan di Korte di apelashon a indiká ku e aspekto aki no ta pará bon kla den artíkulo 7 di e lei di reglanan pa kandidatonan ku ta pasa screening. Esaki mester ta bon kla den e lei pará.

Korte di apelashon no ta mira otro “prohibishon” den e lei di integridat pa Braam keda nombrá komo minister di hustisia. Korte apelashon a remarká ku nan no ta bai atendé ku e pregunta si konstitushonalmente òf polítikamente e por keda impedí pa ser nombrá komo minister di hustisia. Tampoko Korte di apelashon ta bai den gravedat dje echo ku a keda probá kontra di Braam.

Pues Korte di apelashon ta yega na e konklushon ku Braam no a keda kondená segun artíkulo 7 dje lei di reglanan di integridat pa kandidato pa minister.

Gobièrnu tin di paga e gastunan di e proseso di tantu di Korte di Promé instansia komo den Korte di apelashon. NOTA: E articulo ta scirbi den Papiamento fonetico di Corsou.