Na juli College Aruba Financieel Toezicht ta cuminsa traha na Aruba

ORANJESTAD – Entrante 1 di juli proximo, Aruba lo conoce su propio CFT, mas concreto, un College Aruba Financieel Toezicht (CAFT) cu lo supervisa e situacion financiero di pais Aruba. Diadomingo atardi, gobierno di Aruba y Hulanda a emiti un comunicado cu ta splica kico a sosode, -den liña grandi-, diasabra y kico e acuerdo ta ensera. E base ta e constelacion di e comision (di tres persona), e fecha cu esaki ta cuminsa, y cu e ta termina den un asina yama ‘begrotingskamer’ unabes cu Aruba yega su meta di tin un presupuesto duradero balansa. Ambos parlamento lo wordo informa di esaki den e dianan cu ta bin. Lesa aki bou e comunicado traduci. 

Comunicado traduci textualmente:

Aruba y Hulanda ta yega na un acuerdo

ORANJESTAD - Diasabra ultimo gobierno di Aruba y Hulanda a yega na un acuerdo pa un supervision financiero independiente, pa cuida e palabracionnan anteriormente haci y e palabracion di mas aña. E esfuersonan aki ta dirigi pa yega na un presupuesto duradero y balansa y conduci na estimacionan prulianual (meerjarenraming).

JULI

Entrante 1 di juli, un College Aruba Financieel Toezicht lo ehecuta supervision independiente riba normanan stipula y palabra. E college lo consisti di un miembro di Aruba, uno di Reino Hulandes y uno di Hulanda. Unabes cu Aruba alcansa un presupuesto balansa duradero, un asina yama ‘begrotingskamer’ lo wordo institui, cu ayudo di Hulanda. Gobierno di Aruba lo presenta un concepto di ley, cu ta regla e supervision structural aki. Cu e acuerdo aki tambe ta bin un fin na un trayecto largo di negoshacion riba e formulacion di un supervision dirigi riba finanzas duradero pa Aruba.

PANAMA

Tabata na Panama, cu durante discusion entre premiernan Rutte y Eman recientemente, a conduci na un bon base di confiansa pa por a yega na e resultado aki. Den cuadro di esaki, gobierno di Aruba y Hulanda despues di e reunion di Conseho di Minister di Reino di 24 di april ultimo, a continua cu e combersacionnan aki y cu por a trece, hunto cu Plasterk, un proposicion alternativa. Tanto premier Mike Eman como minister Ronald Plasterk tabata hopi contento cu e resultado. Ambos pais lo informa nan respectivo parlamentonan riba e acuerdonan logra.

Lesa e texto original na hulandes aki