Aruba Marriott a reconoce tres empleado cu a salba bida di un huesped

PALM BEACH  – E compleho di Aruba Marriott dialuna a manda felicitacion pa  Marcel Maduro – Loss Prevention Supervisor, y Shurwensley Geertruida y Anthony Scholten – ambos Loss Prevention Officers cu nan reconocimento di Sr. e doño grandi David Marriott, despues di a salba bida di un huesped – Sr. Kai Kuo – kende tabata kendando na Marriott’s Aruba Surf Club na maart 2023. 

CHAIRMAN CITATION AWARD

E reconocimento aki ta conoci den Marriott International como e ‘Chairman’s Citation’ award, cual ta diseña pa reconoce asociadonan cu tabata parti di un esfuerso pa salba un bida, pa asina gradici e asociado pa nan acto di balentia y alaves promove seguridad en general dentro di e compania di Marriott International. 

TRAINING, TEAMWORK Y BALENTIA

Training, teamwork y balentia tabata e formula cu a yuda salba bida di Sr. Kai Kuo ora cu a bati alarma pa ayudo na lama unda tabata tin un huesped cu a wordo saca fe lama sin pulso. Marcel, Shurwensley y Anthony a reacciona inmediatamente pa duna asistencia por medio di CPR y usando e ‘automated external defibrillator (AED)’ pa asina stabilisa e huesped mientras tabata en espera di yegada di ambulance. 

ACTO HEROICO

E reaccion y accion di Marcel, Shurwensley y Anthony ta un acto heroico y di admira, cual sigur Sr. David Marriott tambe a reconoce den un forma bunita di aprecio por medio di e reconocimento grandi aki. Jay Galindo – Marriott International su Senior Director di Global Safety & Security – Risk Management, a otorga e reconicimento special aki personalmente na e tres asociadonan durante un bishita na nos isla. Gerencia y staff di e compleho di Aruba Marriott ta hopi orguyoso y agradecido na nan tres heroenan y ta felicita nan cu e reconocimento significante aki. Un gradicimento special ta wordo extendi na Johanna, un otro ‘first respondent’, kende tabata riba beach ora e incidente a tuma lugar y a bin duna asistencia di biaha.