Aruba wardando riba Hulanda pa relata riba e protocol firma

ORANJESTAD – Tin un wega di wardamento a cuminsa entre Hulanda y Aruba, pa publica algo oficial riba e protocol di cooperacion firma entre Aruba y Hulanda ayera. For di ayera cu e protocol di cooperacion mutuo a keda firma, gobierno di Aruba a raporta cu ‘dentro di algun ora’ lo a bin cu un comunicado. Mas di 24 ora despues, ainda tin un silencio riba e asunto. Y esey a crea caminda pa speculacion riba e motibonan. Entre nan, cu lo tin problema den seno di AVP, pa e loke cu e gobierno di Aruba a firma y pesey tin tardansa. Fuentenan fidedigno a confirma na NoticiaCla.com un rato pasa sinembargo, cu e problema no ta sinta na Aruba, sino Hulanda, cu no tin fin di manda e draft bek pa Aruba pa e por wordo publica. 

DRAFT MANDA PA HULANDA 

Investigacion basa riba esaki cu NoticiaCla.com a haci despues a confirma cu for di ayera, Aruba a manda su draft pa Hulanda, cu tin cu aproba esaki y pone su version tambe ya cu ta trata di algo mutuo. “Nos no a haya nada bek ainda”, e fuentenan serca di e proceso a sigui bisa. Pues e informacion ta cu e concepto ta pega na Hulanda y no na Aruba. “Tin posibilidad cu Hulanda tin problema cu e documento cu a wordo firma. E minister hulandes di finanza (Jeroen Dijselbloem) tambe tin cu firma y no a haci esaki tampoco). Esey ta indica cu entre nan mes tin un desacuerdo di loke a wordo firma na Aruba.

KICO A WORDO FIRMA 

E fuentenan a confirma tambe cu te cu ayera ainda, Hulanda tabata para fuerte cu nan kier un CFT permanente. "E tabata conbersacionan fuerte, cu yen di bay bin, pero esey ta e realidad y a ser firma “ Tampoco nan tabata kier un begrotingskamer di Aruba. Y ayera a firma y bay di acuerdo cune". Loke cu ademas ta conoci, ta cu e comision lo ta di 3 persona, 2 hulandes y 1 persona di Aruba, y cu e ta un comision cu lo funciona pa un periodo te cu 2018, y lo evalua e resultado despues. Y cu e comision lo yama Aruba Financieel Toezicht, enbes di CFT.