Na Corsou, minister Hulandes Kuipers ta spera cu palabranan di Rey ta duna consuelo

WILLEMSTAD - Minister di Salubridat Públiko, Bienestar i Deporte di Hulanda, sr. Ernst Kuipers, djasabra mainta a duna un diskurso durante selebrashon di Dia di Emansipashon riba Brionplein na Otrobanda. Kuipers a papia despues di diskurso di Rei Willem-Alexander na Hulanda. Tur hende durante e seremonia riba Brionplein a wak e spich di Rei Willem-Alexander ‘live’ riba un pantaya grandi. Willem-Alexander – ‘komo Rei ku ta forma parti di gobièrnu hulandes’ – a pidi despensa pa ròl di Hulanda den historia di sklabitut i tambe el a pidi pordon (‘vergiffenis’). Willem-Alexander a duna su diskurso durante Konmemorashon Nashonal di Pasado di Sklabitut na Oosterpak na Amsterdam. Segun Willem-Alexander e ta pidi su pordon ku henter su alma i kurason. Minister Kuipers despues di e diskurso di Willem-Alexander a bisa ku e ta spera ku e mensahe di Rei Willem-Alexander ta duna pueblo di Kòrsou konsuelo

Kuipers tambe a menshoná ku dia 3 di òktober durante un seremonia na Kòrsou lo duna rehabilitashon na Tula. Pa e motibu sekretario di estado Alexandra van Huffelen (Relashonnan di reino) lo bishita Kòrsou.

Segun Kuipers rehabilitashon di Tula ta hopi importante. “Esaki ta e motibu ku sekretario di estado Van Huffelen ta bin Kòrsou dia 3 di òktober. Pa asina duna honor na Tula i tur otro persona ku a lucha kontra sklabitut i komersio di ser humano.” Kuipers a bisa ku lucha di Tula i su kompañero ta impreshonante. NOTA: Texto ta scirbi den Papiamento fonetico di Corsou.