Bermudez: Berdad a firma un ‘protocol di asistencia mutuo’

ORANJESTAD – “E ta confirma”, ta e prome reaccion di por lo menos un minister di gabinete Mike Eman II riba e acuerdo firma awe merdia entre Aruba y Hulanda pa supervision financiero di pais Aruba. NoticiaCla.com a haya reaccion di minister Angel Bermudez (finanzas) awe nochi, cu a confirma e firmamento,y cu ‘ta trata di un protocol di asistencia mutuo”. E mandatario a bisa cu no por duna mas comentario awo, pasobra ‘minister di finanza hulandes ainda mester firma e protocol”. Gobierno mientrastanto a informa for di merdia, cu e lo duna un declaracion riba e tema, pero esey no a sosode ainda. Presidente di parlamento Marisol Lopez Tromp no a wak e protocol, pero si a haya algun detayes y a comparti esaki.

PRESIDENTE PARLAMENTO

Presidente di parlamento Marisol Lopez Tromp a confirma na NoticiaCla.com cu e la invita premier Mike Eman pa presenta na parlamento dialuna awo, pa duna cuenta riba e protocol cu a wordo firma. “Mi a pidi gobierno copia di e protocol”, e la sigui bisa. E ta haya cu e protocol aki no por ta un secreto y como tal ta prudente pa mas lihe posibel e acuerdo aki keda presenta. Mes momento e presidente a bisa cu e informacion cu e tin, ta cu e comision cu ta hiba e nomber di AFT (Aruba Financieel Toezicht) , lo consisti di 2 persona hulandes y un persona arubano. No ta conoci ken nan ta, y sigur no esun local. Tambe cu e lo ta pa un periodo specifico, esta no uno pa un periodo ilimita. Informacion cu NoticiaCla.com a haya, ta cu esaki ta valido te 2018.

LIDERNAN DI FRACCION

Lidernan di fraccion di AVP y Democracia Real a reacciona tambe riba e acuerdo. Ambos lider, a bisa si cu nan ta considera esaki como declaracionnan preliminar ya cu ningun di dos a mira y lesa e protocol ainda.

ANDIN BIKKER

“Mi reaccion preliminar ta cu gobierno, despues di a hunga hopi comedia localmente, a bay di acuerdo cu CFT wordo introduci pa Aruba” Andin Bikker a cuminsa na bisa. “Djies e nomber a cambia AFT envez di CFT”. E parlamentario a sigui bisa cu e la pidi un agenda punt nobo pa dialuna, riba e tema banda di presupuesto. “Mi a compronde cu voorzitter tambe a dicidi caba riba di añadi e agenda punt aki” Bikker a finalisa bisando.

RENE HERDE

Pa loke ta lider di fraccion berde, Rene Herde, e tabata mas breve. “Mi no sa kico tin aden. Ora cu mi lese, mi por duna mi opinion”, Herde a cuminsa na bisa. “Mi no a wak e acuerdo ainda. Loke mi sa ta di e combersacion breve cu sr Plasterk. Pero esey ta prome cu nan a finalisa e acuerdo” Herde a continua bisando. “Nos lo mester warda te ora mi les ‘e”.

EVELYN WEVER CROES

Mientras cu pa partido MEP, Evelyn Wever no a duna su declaracion ainda, e la comenta si riba su Facebook, dunando un pensamento breve:” Ni kico wordo negosha entre Hulanda y Aruba, tanten cu Mike Eman ta na mando, nada lo yuda, pasobra e ta manera “dweilen met de kraan open”. Prome cu esey e la comenta riba e loke tabata sosodiendo, y cu posiblemente lo a firma un acuerdo. Pero no a haya si su reaccion (aparte di e comentario breve), kico ta e punto awor di e partido.

E ACUERDO INICIAL

Tawata awe merdia cu gobierno di Aruba y Hulanda a haya otro riba loke mester bira e supervision financiero di nos pais. Awe merdia prome cu e delegacion hulandes a bandona Aruba, Minister Ronald Plasterk y e delegacion di Aruba a firma e acuerdo valido te 2018, cu tin cu bira un ‘landsverordening’, cu lo hiba e nomber di AFT (Aruba Financieel Toezicht). E lo por opera manera cu e actual College Financieel Toezicht ta opera. E tabata algun ora di basta tension, pero cu finalmente a resulta den un acuerdo cu ambos pais por biba cune.

LANDSVERORDENING

E contenido exacto no ta conoci, pero lo mester a keda divulga dentro di poco. Informacion cu NoticiaCla.com tin, ta cu ta trata aki di un tipo di ‘algemene maatregel van rijksbestuur’ cambia. E ta un maatregel cu conceptualmente tabata cla, pero cu insistencia di Aruba, a wordo cambia y adapta di tal forma cu Aruba lo por a bay di acuerdo cune. E acuerdo aki ta indica tambe cu AFT tin cu sigura cu gobierno di Aruba ta tene su mes na cierto palabracionnan y yega cierto metanan poni.

REUNIONAN INTENSO

For di diahuebs, e super ambtenaar Richard van Zwol tabata reuni intensamente na Aruba pa logra un acuerdo. Entre e actividad di Sail Aruba, tambe por a nota combersacionan intenso entre gobierno di Hulanda y Aruba, cu finalmente a culimna diabierna anochi laat den un reunion di conseho di minister di Aruba di ultimo ora. E reunion no a bay bon y a palabra cu lo a continua despues. Den oranan di marduga e reunionan aki a continua y a lanta awe mainta cu problema.

MENASA DI RETIRO

E problemanan tabata di tal gravedad cu varios menasa a cay. Entre nan prome minister di Aruba a ricibi un carta ayera nochi laat di minister Otmar Oduber cu si gobierno di Aruba firma e acuerdo segun normanan di Hulanda, e lo entrega su retiro. Finalmente a traha henter mainta pa por a logra algo prome cu e delegacion hulandes bandona Aruba awe merdia/atardi. Den curso di dia, lo haya un declaracion oficial di parti di gobierno.