OM: Castigo di prizon exigi pa dos ruman pa intento di homicidio contra turista

ORANJESTAD - Huez den Prome Instancia a trata awe e caso penal contra dos sospechoso cu ta wordo acusa di intento di homicidio, den e caso cu a haya e nomber Voyager.. E sospechosonan ta e rumannan T.E.A.B. (24) en C-A.M-G.E.B. (22).

Ta acusa nan di a dal y scop un turista Canades tanto cu el a sufri lesion fisico hopi grave y cu hasta e lo por a fayece. E incidente violento aki a tuma lugar riba un parkinglot na cruiseterminal na Oranjestad.  E dos sospechosonan a admiti loke nan a haci y ta wordo considera totalmente responsable pa nan accionnan. Nan a bisa di no por corda mucho di e sucedido, probablemente debi na nan uso di alcohol y droga. 

Fiscal di husticia a exigi contra e sospechoso T.B. un castigo di prison di siete aña. Ministerio Publico a exigi contra e sospechoso C-A.B. tambe un castigo incondicional di siete aña. E tempo cu nan a sinta den detencion preventivo lo wordo kita di e total. 

Fiscal a enfatiza den su requisitorio cu e caso horible aki a haci hopi daño na e victima y su famia. Pa hopi tempo nan lo sufri e consecuencianan traumatico di e dia ey. A haci daño tambe na Aruba y particularmente na e imago di nos pais como destinacion di vakantie safe. Niun hende aki na Aruba lo desea pa turistanan wordo confronta cu un explosion di violencia manera e sospechosonan a causa. Turistanan mester sinti nan mes sigur y proteha tur caminda na Aruba y na cualkier momento durante dia of anochi. Huez lo dicta sentencia riba 7 di juli 2023.