Na Corsou a suspende hefe di servicio veterinario relaciona cu morto di dos cacho

WILLEMSTAD - Ayera promé minister sr. Gilmar Pisas den su kalidat komo minister di GMN bou di kual Servisio Veterinario ta kai, a skòrs e hefe di Servisio Veterinario, Arnold Dwarkasing relashoná ku dos kachó ku e servisio veterinario a pone drumi, sin a hasi tèst pa mira ki tipo di malesa e bestianan ku a bini for i Sto. Domingo tabatin.

T’asina ku djárason riba retnan sosial a lanta un konmoshon total na momentu ku doñonan di e dos kachónan hopi emoshoná a akusá e servisio di pone bestianan drumi di forma inhustu.

Ayera a skòrs e hefe su entrada na fasilidat di e servisio pa 3 luna p’asina por hasi investigashon di morto di e 2 kachónan ku a bini for di Sto. Domingo.

Sra. Nicolina di Servisio Veterinario a duna splikashon amplio di loke a pasa ku e dos kachónan. Segun e veterinario e bestianan tabatin e malesa di “Rabia”, kual ta sumamente peligroso tantu pa animal komo bida di hende. Ademas ku e doñonan di e animalnan no tabata disponé di tur dokumento manera rekerí, i ku e doñonan tabata bon na altura ku lo a bai laga e animalnan “drumi” (esta mata nan).

Awor e hefe di servisio tin di bai responsabilisá pa loke a pasa. Pasobra ta resultá ku e animalnan a drenta Kòrsou djadumingu 25 di yüni pa 09:30 or for di Sto. Domingo. Den kareda di 12:30 or Servisio Veterinario Curaçao a bai ku e dos kachónan den karentena, pasobra supuestamente tabata falta un tèst di sanger. Ta resultá ku den ménos ku 24 ora, e servisio veterinario ya a duna e òrdu pa spùit i matanan. Ademas sin ku doñonan di e animal tabata aserka. NOTA: E texto ta scirbi den Papiamento fonetico di Corsou.