Fundacion Muchila Creativo ta tene nan Openhouse otro weekend

ORANJESTAD – Diasabra awor e fundacion Muchila Creativo ta presenta nan openhouse pa comunidad di Aruba. Fundacion Muchila Creativo ta un organisacion no lucrativo cu ta crea oportunidadnan pa mucha, hoben y tambe pa adulto pa desaroya nan mes den e cuatro dominionan di arte:Teatro, Baile, Musica y Arte Visual. Ademas di e cuatro disciplinanan di arte ta ofrece Terapia di Musica, Terapia di Arte Creativo y proyectonan cu ta relata riba tereno di multimedia y Literatura. E Openhouse lo tuma lugar diasabra 8 di Juli 2023 na nan cede den Caya Betico Croes 110, entre 16.00 or y 18.30 or na unda lo ofrece tur informacion di e scol y su profielnan. Tambe tin un openhouse na e dependance, Violet centro di educacion na Caya Betico Croes 83, di 19.00 or pa 22.00 or.  Lo recibi informacion tocante eMBO-Plus opleiding y e cursonan pa adulto.

La Fundacion Muchila Creativo ta un organisacion no lucrativo cu ta crea oportunidadnan pa mucha, hoben y tambe pa adulto pa desaroya nan mes den e cuatro dominionan di arte:Teatro, Baile, Musica y Arte Visual. Ademas di e cuatro disciplinanan di arte ta ofrece Terapia di Musica, Terapia di Arte Creativo y proyectonan cu ta relata riba tereno di multimedia y Literatura.

Fundacion Muchila Creativo ta enfoca ariba nivelnan social, educativo, cultural, artistico, terapeutico y ta facilita, sostene, inicia, y organisa proyecto y eventonan pa yuda nos comunidad local.

Nan metanan ta:

-        Pa desaroya y promove Arte den comunidad Arubano mas amplio posibel.

-        Pa medio di e diferente disciplinanan di Arte,  amplia e conocimiento di Arte y Cultura den nos comunidad, y via Musica y Terapia di Arte.

-        Pa desaroya nan propio habilidadanan creativo y artistico

-        Pa desaroya confiansa y autoestima

Fundacion Muchila Creativo a establece na september 2020 un scol secundario pa hobennan cu limitacion a traves di arte, ya cu no tawata tin un scol secundario pa hoben cu limitacion na Aruba. Nos grupo meta ta entre 15 y 28 aña di edad. Nos meta ta pa prepara e hobennan pa mercado laboral. 

Colegio Muchila Creativo ta ofrece un programa amplio caminda studiantenan por desaroya nan capacidadnan a traves di arte y asina por aumenta nan habilidadnan pa por comunica, gana confiansa, desaroya nan motorico y habilidad pa resolve problema. Tambe nan lo desaroya nan propio autoestima y motivacion pa logra nan metanan. 

Durante e aña escolar e studiantenan ta haya oportunidad pa core stage y ricibi experiencia di trabou na cierto lugarnan, loke ta dificil pa haya, pasobra nan mester trabou bou guia di profesionalnan cu tin experiencia y sa con pa guianan.

Nos siguiente nivel ta pa desaroya un centro di educacion, a traves di arte, pa crea un lugar pa siña y traha y tin cooperacion cu negociantenan local, cu tin ful comprendemento y aceptacion di nos studiantenan y un deseo pa guianan pa empleo den futuro. E lugar di enseñansa y labor ta ofrece nos hobennan cu limitacion un oportunidad pa ocupa un trabou di balor, cu pago laboral, pa infunda den nan un sintimiento di balor propio y autoestima, pa promove nan independencia pa contribui na e cualidad di bida diariamente pa por biba den nos comunidad Arubiano.

Na Violet, centro di educacion, tambe lo inicia entrante e aña escolar nobo cu un formacion preparatorio pa un MBO-Plus opleiding pa studiantenan entre 15 cu 22 aña cu a caba cu MAVO of HAVO.  Tambe lo ofrece cursonan pa adultonan riba diferente tereno. Si bo ta interesa den un of mas curso of kier mas informacion tur loke nos ta ofrece, pasa libremente na nos openhouse y haya sa tur loke nos tin di ofrece.