Reto a pone cu cuentanan annual di pais Aruba no por a keda cla na tempo

ORANJESTAD – Cierto reto a pone cu cuentanan annual di pais Aruba no por a keda cla na tempo. Asina minister di finanza Xiomara Maduro a splica diahuebs durante un conferencia di prensa. E la haci mencion di esaki como reaccion ribaalgun politico na Aruba y na Hulanda cu e dianan aki a lansa critica riba e hecho cu Algemene Rekenkamer Aruba ARA ainda no a ricibi e Cuentanan Anual di aña 2019 bin ariba pa por haci nan control. E politiconan a categorisa e retraso aki como mal maneho financiero, sin cu nan sa ta cual ta e retonan cu Departamento di Finansa a confronta cu a causa retraso den e produccion di e Cuentanan Anual di Pais Aruba desde aña 2019, e mandatario a bisa.  

COMPANIA EXTERNO 

Ademas e mandatario a informa cu e Departamento di Finansa a pidi asistencia di un compania externo di accountant pa yuda guia e proceso pa compila e cuentanan anual pa aña 2019 y aña 2020, pa asina por keda cla mas lihe. Sinembargo aki tambe a surgi tardansa debi cu gobierno su administracion ta uno particular y diferente na locual ta comun den sector priva. A tuma tempo pa e compania por a 'gara e maña' di e administracion di sector publico y esaki a causa mas tardansa den e compilacion di e cuentanan anual.

CIFRA DI AÑA 2019 TA FORMA BASE PA CONTROL

Un otro factor cu a hiba na tardansa ta, cu e cifra y informacion di aña 2019 ta bay wordo uza como base pa por yega na un cuenta anual pa aña 2020 cu por wordo controla globalmente pa un accountant. E mehoracion aki den maneho financiero di nos Pais, pa logra yega na un cuenta anual certifica pa un accountant, ta rekeri extra trabou cu tambe ta hiba na tardansa.

Pa ki tempo por spera Cuentanan Anual di Pais Aruba?

Minister Maduro ta premira pa entrega cuentanan anual na Algemene Rekenkamer Aruba ARA segun e siguiente schema:

Aña 2019 na fin di juli 2023

Aña 2020 na november 2023

Aña 2021 na februari 2024

Aña 2022 na juni 2024

Aña 2023 na september 2024 manera ley ta prescirbi.