Secrets Hotel: Respetando corte, lo construi solamente unda permiso ta permiti

ORANJESTAD -  Three Rivers Real Estate, desaroyador di Secrets Baby Beach Hotel diahuebs atardi a ‘kibra silencio’ y reacciona riba e situacion cu nan ta aden awor cu corte a prohibi e construccion principal di continua. E compania responsabel esta Three Rivers Real Estate a sigura cu nan ta respeta completamente e decision di corte recientemente relaciona cu un disputa cu un permiso di construccion na un area specifico di e proyecto di e hotel. “Mientras cu e sentencia aki ta limita e actividadnan di construccion den e area concerni te ora cu un sentencia di corte wordo emiti, e no tin influencia riba e continuidad di e resto di e proyecto, unda cu e permiso legal ya a ser declara irevocable pa e corte y, consecuentemente, e construccion ya ta andando” e compania a sigui bisa.

Segun e compania, e decision di corte, emiti pa corte di prome instancia, ta reconoce e necesidad pa sigui procesonan regulatorio y a dirigi su maneho pa no construi den e area den disputa te ora cu un decision wordo tuma pa corte relaciona cu e permiso di construccion cu ta wordo disputa pa algun habitantenan den e area. "Mientras cu nos ta respeta e decision di corte relaciona cu e permiso di construccion pa e area den disputa, nos ta contento di por continua e construccionnan den e seccion di nos proyecto caminda permisonan legal a ser declara irevocabel. E trabaonan aki lo wordo realisa cumpliendo cu tur e reglanan y guia aplicabel di e instancianan concerni. Awor nos ta wardando e decision di e corte tocante e areanan den disputa," asina Sr. Alejandro Murcia, director di Three Rivers Real Estate a declara.

Ademas, e compania Three Rivers Real Estate a sigura cu nan ta  keda comprometi pa un comunicacion transparente y mantene un Partnership solido cu pueblo di San Nicolas y henter comunidad di Aruba. NOTA: E imagenan ta e resultado di ora cu e proyecto termina cu lo forma parti di Secrets Baby Beach Hotel.