Pareha Real a bishita EPI awe mainta tempran

ORANJESTAD – E bishita Real di SM Rey Willem Alexander y Reina Maxima a finalisa awe mainta despues di nan bishita na EPI pa atende cu varios grupo di persona y proyecto. Entre e gruponan bishita, tabatin Stichting Reclassering, y Heart Centered Leadership Foundation. Tur tabata presente na Educacion Profesional Intermedio (EPI).

SESSION CU MAESTRONAN

E sessionnan tur a wordo guia pa sr Tjeenk Willink, aunke na dado momento e Rey mes a tuma over. E prome conversacion tabata cu un grupo di 6 maestro cu ta envolvi cu e Stichting Reclassering y Heart Centered Leadership Foundation y cu ta guia e hobennan cu ta forma parti di esaki. Tabata notable cu e pareha Real kier a mira con e trabou por wordo mehora, kico e diferencianan ta cu Hulanda y kico ainda falta pa por mehora e situacion ainda. A resalta cu mester bin un miho envolvimento cu e mayornan di e muchanan aki, ya cu esaki no semper ta e caso.

SESSION CU ALUMNO

Despues a sigui algun session mas, entre nan un combersacion entre e Rey y e alumnonan y tambe uno entre e Reina y un otro grupo di alumno. E Rey a sinta cu dos alumno cu mester a splica nan experiencia cu e programa di ‘middag mavo’. E Rey den tur session a mustra hopi interesa y a purba saca basta informacion for di e dos hobennan. Mas cobertura di e bishita aki, na caminda.