Wever-Croes: Ta sostene Secrets hotel, pero ta pensa tambe cu hues a haci un eror

ORANJESTAD – Gobierno di Aruba ta sostene Secrets hotel pero ta respetuosamente opina tambe cu hues a haci un eror ora cu a para e proyecto, basa riba keho di un grupo di habitante di Seroe Colorado. Tabata diaranson merdia durante un entrevista cu Baboe Hoek di Power 101.7 FM, cu e prome mandatario a papia publicamente riba e proyecto di Hotel Secrets, cu ta programa pa bin na San Nicolas entrante aña 2024. 

KEDA KETO

E mandatario a splica cu e motibo cu Gobierno ta keto na e momentonan aki pa loke ta e situacion di e hotel, ta pa motibo cu tin un veredicto di hues, na unda ta pone un stop na e construccion di Hotel Secrets. Lamentablemente, tin un grupo di hende cu no ta di acuerdo pa construi un hotel den e area aki, y a entrega un accion contra e "bouwvergunning" di e hotel. Gobierno na su turno, no tabata di acuerdo cu e veredicto di hues, y a apela, pero no a haya rason. Prome Minister a indica cu e trabounan pa cu e construccion di e hotel a cuminsa legalmente, tur permiso ta otorga y tur papel ta legalmente na ordo. E ta den ley si, cu unabes habitantenan tin cierto obhecionnan, nan mester wordo scucha. Pa loke ta e veredicto di hues, Prome Minister ta kere cu respetuosamente hues a haci un eror y cu pronto lo bin claridad. 

GOBIERNO TA PRO SECRETS

Prome Minister a expresa cu e ta sumamente importante pa comunidad di Aruba sa, cu Gobierno ta sostene y ta kere den proyecto aki, y lo sigui bringa nan posicion, cu speransa cu husticia lo prevalece. Tambe el a indica cu e proyecto aki lo no solamente trece desaroyo economico pa pais Aruba y pa San Nicolas, pero tambe lo mehora e bida social di tur esnan cu ta habita den e area aki, mirando cu nan lo por eherce nan trabou cerca di nan hogar. Prome Minister a splica cu tin un palabracion haci entre Gobierno di Aruba y Hotel Secrets, cu na momento di aplicacion pa trabou, esnan cu ta biba den San Nicolas, lo tin prioridad pa haya trabou eynan. Esaki sigur ta un alivio grandi pa e habitantenan di San Nicolas di no mester lanta extra trempan tur mainta pa por yega na pia di trabou na ora. 

BENEFICIO GRANDI

Loke Prome Minister a splica tambe ta cu e proyecto aki no solamente ta beneficia esnan cu ta biba na San Nicolas pa hay trabou sino tambe esnan cu ta desea di habri un negoshi chikito, pa asina por brinda servicio na e turistanan hosepdando den e hotel. Esaki ta e motibonan pakico Gobierno lo haci su maximo esfuerso pa logra haci e proyecto aki un realidad. 

BON COMUNICACION CU DESAROYADORNAN

Pa loke ta e desaroyadornan, Prome Minister a indica cu Gobierno tin un bon comunicacion cu nan, y cu nan ta sumamente agradeci pa e sosten cu Gobierno ta brindando nan. Si yega e momento na unda cu nan lo dicidi pa no sigui mas cu e proyecto aki, causando un daño prehucio na pais Aruba, Gobierno lo entama un caso contra esnan responsabel pa cu esaki.  "Mi ta pidi tur hende pa no perde speransa, ban keda positivo pa asina nos por surpasa e reto aki mas lihe cu ta possible," Prome Minister Evelyn Wever-Croes a expresa.