Joran vd Sloot na Merca a pidi corte alarga fecha pa trata su caso di extorsion

BIRMINHAM - Joran van der Sloot, cu ta na Merca riba sospecho di e.o. extorsion di e mama di Natalee Holloway, Beth Holloway pa 25 mil dollar, a renuncia su derecho pa un caso hudicial liher, y a pidi pa extencion riba e ultimatum di e sessionan ‘pro forma’, incluyendo si e lo admiti culpabilidad of no durante e proceso di corte. Asina su abogado Kevin Butler a informa prensa Mericano diamars. Por compronde cu esaki ta pa tarda e proceso y pa e por keda Merca mas largo, casi sigur y tarda su regreso pa Peru mas largo cu ta possible. 

EXTENSION

E abogado dialuna a pidi corte pa un extencion di 30 dia pa e fechanan inicial di e proceso di corte, y a pidi pa prolonge te hasta 60 dia si por. E deadline awor poni pa van der Sloot informa huez si e tin planea di declara su mes culpable of pa cuminsa e caso mes, ta poni pa dia 17 di juli proximo. Mientras cu huez no a dicidi ainda riba e mocion di vd Sloot, e oficina di fiscal di disctricto norte di Alabama encarga cu e caso, no ta oponiendo e peticion di e defensa, segun documentonan di corte. Segun documentonan di e abogado, e mester di mas tempo pa revisa e informacion adkeri, investiga e caso y prepara pa e caso, y como tal ta den interes di husticia pa prolonga e ultimatum y e fecha di e caso” Butler a bisa. 

EXTRADICION

Vd Sloot a keda extradita dia 8 di juni ultimo for di Peru, unda cu e tabata sinta un castigo di prison di 28 aña pa asesinato contra e Peruana Stephany Flores na 2010. E siguiente dia cu e la yega Merca, e la declara su mes no culpable na fraude di transaction financiero y extorcion. E ta cera den e prison di Shelby County, y e caso ta wordo prosegui pa Lloyd Peeples, hefe di fiscalia division criminal y asistente procuror general Catherine Crosby.