Van Huffelen: No tin suficiente sosten pa matrimonio di mesun sexo na islanan CAS

DEN HAAG – No tin suficiente sosten pa introduci matrimonio di mesun sexo riba e islanan Aruba, Corsou y St Maarten. Asina secretario di estado Hulandes Alexandra van Huffelen a contesta miembro di Eerste Kamer Dittrich (D66)  dialuna riba su preguntanan riba e tema. Dittrich ta un di e miembronan cu publicamente ta un miembro homosexual di Eerste Kamer. Segun van Huffelen, e ta lamenta e hecho aki, esta cu ainda e islanan no ta cla pa acepta matrimonio di mesun sexo. Pero mes momento e ta bisa cu debi na e autonomia di e islanan, su podernan ta limita. E combersacion tabata cu e tres minister presidentnan di e respectivo islanan.  

SENTENCIA

E la informa Eerste Kamer mesora tambe cu Corte Comun algun tempo atras a emiti dos sentencia di huez unda cu Hof ta dicidi cu Corsou y Aruba a viola e prohibicion di discriminacion, manera cu e ta stipula den constitucion, door di exclui partnernan di mesun sexo di matrimonio. A recorda Tweede Kamer tambe cu tanto Corsou como Aruba a opta pa bay Corte di Casacion pa bringa e sentencia aki. “Mi ta warda e resultado di e procedura di Hoge Raad y despues cu e sentencia ey cay, mi lo tuma nota y trece e consecuencia dilanti despues”, e mandatario a sigui bisa den e carta. 

RESPONSABILIDAD DENTRO DI REINO

Segun e mandatario Hulandes, e ta pensa si cu tur hende mester por casa cu e pareha cu e ta desea. Pero e ta recorda tambe cu den Reino Hulandes tin 4 pais autonomo. “E autonomia ta trece obligacionan y responsabilidad cune. E paisnan dentro di Reino como tal mes ta responsabel pa garantisa e realisacion di e derechonan humano y e libertadnan fundamental. No ta keda na Hulanda pa determina con e otro tres paisnan menciona mester implementa esaki” e mandatario a continua bisando. Pa lesa e carta completo, click AKI.