Corte: Construcion di Secrets Hotel ta keda suspendi

ORANJESTAD - E permiso di construccion di Secrets Hotel, (Three Rivers Real Estate) ta keda suspendi. Esaki ta resultado di e decision di Presidente di Corte Comun di Corsou, St. Maarten, Boneiro, St. Eustatius, Saba y Aruba fin di Mei. E Presidente a considera cu e peticion di Minister pa Asuntonan General, Inovacion, Organisacion Administrativo, Infrastructura y Ordenanza Espacial den su peticion pa un provision temporario pendiente decision di Hof como no-admisibel. Prome Minister Evelyn Wever Croes, como Minister encarga a acerca Corte Comun pa e provision temporario despues cu Corte di Prome Instancia, dia 5 di Mei ultimo a determina cu e permiso di construccion di Three Rivers ta automaticamente suspendi na momento cu habitantenan di Seroe Colorado, representa pa Mr. Boyce a entrega obhecion.

PERMISO DI CONSTRUCCION

Three Rivers Real Estate a ricibi un permiso di construccion pa e hotel na Sero Colorado y ciudadano (nan) entre otro habitante  W. Werkema a entrega un obhecion (bezwaar), pero Minister a decreta cu e ciudadano no tabatin motibo pa entrega tal obhecion. Den e caso sumario entama pa habitante W. Werkema y otro habitante (nan), corte a rechasa e peticion di Werkema pa impone e suspension den e caso sumario paso no tabatin urgencia den e caso, pero basa riba articulo 59 di e bouw en woningverordening, e permiso di construccion ta keda automaticamente suspendi.

GOBIERNO A APELA E DECISION 

Manera a menciona Prome Minister Evelyn Wever Croes, como Minister encarga a acerca Corte Comun pa apela contra e decision aki. Minister tabata kier pa Presidente di Corte Comun pone e interpretacion di Corte Administrativo un banda te na momento cu Corte tuma un decision definitivo den e caso andando, esta e bodemproducedure. Segun Minister, no por suspende e bouwvergunning a base di ley, pasobra no tabata trata aki di un permiso condicional sino un permiso sin condicion. 

USO DI ARTICULO 59

E decision di Presidente di Corte Comun pa mantene e decision di Corte Administrativo, LAR, ta ilustra e balor di articulo 59 di e Bouw en Woningverordening. Por medio di e articulo aki, tur ciudadano, por apela decision di Gobierno na momento di otorga of planea di otorga permiso di construccion na cualkier proyecto, grandi of chikito, si no a tene cuenta cu interes di e propio ciudadano y interes comun. Esaki ta di suma importancia mirando e hecho cu te awor na Aruba e permiso (nan) di contruccion no ta wordo publica den medio nan di publicacion ora di ortogamento di terreno. Pa cu e motibo aki e ciudadano no ta  semper na altura si un edificio ta wordo remodela o construi banda di su propiedad. Esaki ta hasi cu e ciudadano ta corre riesgo di ta laat pa entrega un apelacion. Na mes un momento esaki ta trece of ocasiona daño na esun cu e permiso pa construi a wordo otorga, na Pais Aruba y pa tur su habitante (nan). Cu articulo 59 Bwv e permiso di construccion na cualkier proyecto, grandi of chikito ta wordo suspendi te ora e disputa legal pa cu e permiso di construccion ta keda cla.