Reunion interno di RAIZ a dicidi cu ‘Den bienestar di pueblo, gobierno ta sigui’

ORANJESTAD – “ Den bienestar di pueblo gobierno ta sigui” tabata e mensahe principal cu a sali for di e reunion urgente di diadomingo anochi di Partido RAIZ for di esnan cu a atende e reunion, manera cu e portal aki por a compronde. Manera ta conoci, diadomingo anochi e miembronan di e Partido a reuni na cas di lider di e Partido Ursell Arends, unda cu lo a toca e tema di e proyecto di beach dilanti Embassy Suites, cu a causa un medio crisis den e gabinete. Esaki ora cu prome minister diadomingo merdia a manda un comunicado publico cu su reaccion di sorpresa contra colega di coalicion Arends. E reaccion ey a causa un contra reaccion di Arends, purbando di splica cu tabata un fayo cu a keda cometi y cu no tin problema y cu si tabatin problema mes, esaki a keda coregi, sin bisa kico e coreccion ta. 

CRISIS?

Mesora esaki a crea un impression cu tin un crisis den gobierno entre RAIZ y Partido MEP. Diadomingo anochi e miembronan di RAIZ a reuni internamente pa wak kico ta sosode awor y kico ta bira e futuro di e gabinete aki. Por compronde cu tabatin riba mesa, si ta bay sigui cu e coalicion despues di e reclamo di prome minister, of ta termina e relacion aki cu consecuencia cu gobierno ta bay cas. Pero na final, e portal aki a compronde di su fuentenan cu e partido a dicidi cu pa buena marcha, no ta bay haci dificil y cu “Den bienestar di pueblo, gobierno ta sigui”, manera cu a keda expresa. Esey kier men cu dialuna ta lanta cu tur cos ‘normal’, te asina leu cu por compronde di e fuentenan. A pidi e lider di partido Ursell Arends pa un reaccion dialuna mainta, pero e mandatario no a reacciona ainda. NOTA: E potret ta di archivo di Noticiacla y ta saca despues cu e partido a vocifera nan pensamento riba e asunto di ley di matrimonio di mesun sexo na februari di e aña aki.