HOH: Na Mei hospital a hospitalisa mas di 800 pashent di cual casi 500 tabata di emergencia

ORANJESTAD - Den cuadro di transparencia Horacio Oduber Hospital e siman aki a cuminsa publica diferente cifra desde e luna aki pa asina comunidad por ta na altura di tur loke ta sosode mensualmente pa loke ta cuido na Hospital y tambe LABHOH. Segun e hospital, saki ta un otro paso den loke ta e vision y mision di Hunta di Directiva hunto cu managementteam di HOH pa asina clientenan, pashent y bishitante tin mas claridad di e diferente servicionan cu ta wordo brinda na nos Hospital. 

CIFRANAN

Durante luna di mei a hospitalisa 840 pashent di cual 497 tabata cu emergencia, 216 tabata admision planea y 127 tabata pashent via policlinica admiti cu emergencia. Cada pashent a hospeda den Hospital un promedio di 4,2 dia y durante luna di mei e ocupacion di cama tabata na 92,2%.  Un total di 604 cirugia a tuma luga y a nace un total di 73 baby (44 mucha homber y 29 mucha muhe).  Departamento di Emergencia a mira un total di 3.867 pashent di cual 2.256 pashent no tabata un emergencia, pues tabata pashent di dokter di cas of dokter na warda. 

Specialista a haci un total di 7014 consulta na policlinica cu pashent y Departamento di Radiologia a haci un total di 5220 test manera CT scan, MRI y mas. U total di 11.592 persona a bay LABHOH pa haci nan test y total di 799 pashent a sali for di Hospital.