Venezuela a aumenta su carga di fruta y berdura pa Aruba cu mas di 100%

ORANJESTAD – Despues cu recientemente Aruba a ricibi e prome cargacion di fruta y berdura for di Venezuela, esaki a continua e simannan despues. Eraportahenan di douana y “Secretaria de Economia Productiva y Exportacion” di estado Falcon ta confirma esaki y unda cu por nota cu cada siman tin mas kilo di berdura cu fruta ta yegando Aruba. Den e prome siman di juni aproximadamente 30.000 kilo, a yega Aruba. Den e di dos siman di juni esaki tabata 70.000 kilo, un aumento di mas cu 100%, y ta premira cu esaki lo sigui subi pa e tempo binidero.

Segun minister di economia Geoffrey Wever, esaki ta un indicacion cu e demanda ta existi. Segun e mandatario, si e trend aki sigui asina nos comunidad por spera reduccion den prijs di productonan agricola. Esaki lo tin un efecto positivo directo ariba e forsa di compra di nos ciudadano nan. “Mi ta contento di mira cu e cantidad di berdura y fruta cu ta wordo importa di Venezuela cada siman ta crece”, Minister Wever a comenta, 

Seguridad di cuminda ta importante. Cu un suministro consistente y suficiente di cuminda, di calidad nutritivo ta esencial pa mantene nos poblacion saludabel. Costo di bida ta un factor critico pa calidad di bida, y e prijs di cuminda ta un factor principal. Beneficionan di comercio cu paisnan serca ta conduci na reduccion di costo di transporte, y asina lo yuda baha prijs di productonan, y ta yuda acelera respons ora di crisis alimenticio, unda rapides ta crucial.