Brete a keda sentencia pa caso di fraude na Astec

ORANJESTAD – E persona acusa di estafa y fraude miyonario na e compania Astec, Linda Brete, a haya 20 luna di castigo di prison, kitando 6 luna di e castigo original di 26 luna. Huez a mustra awe mainta cu Brete a causa daño serio y perhudica e fondo di pensioen di e trahadonan di e compania. Di otro banda, mirando e situacion den cual Brete a sinta e prome parti di su castigo, a kita 6 luna di e castigo impone di 26 luna, cu ta pone cu Brete lo tin cu sinta 20 luna di castigo, kitando e lunanan cu e la sinta caba. Fiscal den e caso aki a pidi 36 luna di castigo. Brete tin 2 siman pa apela e sentencia aki.

E CASO

E caso a hala atencion di un dama cu a comete estafa miyonario na Astec.  Brete , acusa di falsificacion di chequenan na balor di mas di 1 miyon florin, tabata den noticia recientemente tambe relaciona cu un keho riba su trato di cel na Kia. Esaki debi cu e condicionnan segun Brete, lo no tabata corecto pe.

CARGONAN OFICIAL

E cargonan oficial contra Brete segun ministerio publico, tabata cu Brete a wordo acusa di falsificacion di chequenan, conhuntamente cu un otro of otronan, den e periodo di prome di october 2009 te 28 di october 2014.Ademas, e la wordo acusa di, conhuntamente cu un otro of otronan, den e periodo di prome di october 2009 te 28 di october 2014, a estafa mas cu 1.000.000 florin di un fondo di pensioen.

CONDICION DI BIDA

Pa loke ta e caso di su condicion di bida den KIA, esaki a keda trata na februari ultimo, ora cu te hasta e huez a bishita KIA pa personalmente tuma nota di e condicionnan. Na tal ocasion e huez a wordo informa cu tabatin tramite pa traslada e damanan pa un seccion diferente. Como tal e huez no a mira motibo pa laga Linda Brete den libertad temporal te ora su caso mester a bin dilanti awe.