Dowers: Rijbewijs nobo ta keda cla pa procesa y entrega na juli

ORANJESTAD – E rijbewijs nobo pa Aruba lo ta cla pa entrega na juli awor. Minister di husticia Arthur Dowers a confirma esaki durante tratamento di e presupuesto ayera den parlamento. E mandatario a admiti cu tabatin un sin fin di problema, y cu finalmente ta mustra cu pa juli, e rijbewijs nobo lo ta cla pa wordo imprimi y entrega na Aruba mes. E fecha exacto no ta conoci, pero si a confirma cu esaki lo ta na juli di e aña aki.

CAMBIA SISTEMA

Ta conoci cu Aruba a dicidi aña pasa cu e proceso di rijbewijs ta cambia y cu na Aruba mes ta haci esaki. Pero e proceso no a bay asina facil manera cu a spera, y a conta cu hopi contratiempo. Mientrastanto mester a busca un solucion temporal, pa cual a dicidi cu pa un tempo temporal, lo a emiti un rijbewijs special, te ora cu e rijbewijs ‘oficial’ keda cla. Esey awor ta bira juli. Otro siman e mandatario lo duna mas informacion riba e asunto aki.