Reunion presupuesto 2015 posponi pa motibo di airco daña

ORANJESTAD – Tratamento di presupuesto 2015 a contrae su prome contratiempo, apenas un dia despues di a cuminsa. NoticiaCla.com a haya confirmacion awe mainta for di presidente di parlamento Marisol Lopez Tromp, cu e reunionnan ta sigui dialuna awor. E motibo ta cu airconan ta daña den e sala di parlamento. Y esaki a causa un ‘calor sofocante, y a pone e sala di parlamento bira manera un sauna’, Lopez Tromp a sigui bisa. “Awor nan ta drechando (e airco) nan”. Como tal e a pospone e siguiente tratamento di presupuesto pa dialuna mainta 9’or, esta comienso di otro siman. Esaki ta e cartera di minister Paul Croes, cu tin e cartera social, labor y di asuntonan di hubentud.

CALOR

Ayera e tratamento a cuminsa cu minister Arthur Dowers. Pero ta for di diamars caba ora cu a trata e presupuesto di Raad van Advies, a nota e calor aki. A kere cu e lo a mehora y como tal a dicidi di continua ayera cu e tratamento di presupuesto di minister Arthur Dowers. Na e momento tabata notable cu varios parlamentario a adapta nan vestuario door di e.o. no bisti bachi, (hombernan). Ayera tardi na final di e tratamento, e presidente di parlamento a declara cu lo a laga nan sa si e reunion di awe ta continua, of no. Esey tabata depende si por a drecha e airconan prome cu esey. Pero esey aparentemente no tabata posibel, pa cual a opta e ora pa pospone e reunionnan te cu dialuna awor 9’or di mainta. Riba e foto por mira minister Dowers ayera den camisa sin bachi, pa motibo di e calor cu tabata haci.