Fuente: Gobernador no a wordo menasa cu castigo di prison

ORANJESTAD – Gobernador di Aruba Freddis Refunjol no a wordo menasa cu prison si e firma e presupuesto di pais Aruba. Fuentenan fidedigno yega na gobernador, a confirma na NoticiaCla diaranson mainta, cu e noticia ey no ta berdad. Nan no ta compronde pakico lider di partido AVP, Mike Eman a bisa loke e la bisa diamars a nochi na su sede, pero e informacion ey no ta berdad. Loke si ta berdad ta cu e la wordo recorda door di Hulanda, pa tene su mes na e KB. “E punto ta cu gobernador no por firma e presupuesto sin permiso di Hulanda” e fuente a sigura NoticiaCla. Pero cu lo a menasa gobernador cu castigo di prison, no ta berdad si. Mientrastanto NoticiaCla a haya confirmacion cu gobernador a yega Hulanda diaranson mainta tempran (ora di Hulanda) y cu den curso di diahuebs, lo inicia cu su ronda di combersacion cu gobierno hulandes. Esaki den cuadro cu diaranson ta dia nacional di luto y lo respeta esaki. Gobernador, no obstante e hecho cu e ta na Hulanda, lo no participa na e ceremonianan aki.

Tabata diamars anochi cu e noticia a plama cu gobernador lo a wordo menasa cu prison si e firma e presupuesto. Esaki ta e splicacion cu lider di partido AVP, Mike Eman a duna su seguidornan diamars anochi na e cede di partido durante reunion di partijraad. “Ora cu gobernador a informami loke a pasa, mi no a pensa otro cu nos mester para banda di dje” Eman a bisa su seguidornan. Gobernador mientrastanto (manera cu NoticiaCla a raporta caba) a biaha pa Hulanda pa discuti e situacion actual di Aruba cu Gobierno di Reino. Ningun momento den su declaracion, e ta haci mencion di un of otro menasa, sino solamente ta informa cu e motibo ta netamente pa purba resolve e impasse, pa bienestar di Aruba.