Joran vd Sloot ta isola den un prison na Alabama, pendiente su caso di extorsion

COLUMBIANA – Casi un siman despues di a yega Merca for di Peru, e sospechoso di desaparicion di e Mericano Natalee Holloway, Joran van der Sloot ta pasa su dianan den un cel na e prison di Shelby County na Columbiana, Alabama. Tabatin critica di parti di esnan cu a experencia e proceso, alegando cu vd Sloot tabatin un actitud basta sarcastico, hariendo ora cu e tabata wordo procesa na su yegada. 

CORTE

Un dia despues cu e la yega Merca, e la keda procesa den Corte Hugo L. Black United States Courthouse pa 11’or di mainta (diabierna). Despues di esey, e la bolbe den su cel, cu ta di un prsona. E ta permiti pa sali un ora pa dia, pero no hunto cu otro prisoneronan sino su so. Y e ta come su cuminda den su cel, envez di den e cafeteria. “E no ta papia, e no ta comunica, pero e ta parce contento unda cu e ta” un fuente den e prison a revela. 

E CARGO

E cargo a indica cu vd Sloot lo a revela e localidad unda cu e curpa di Natalee Holloway ta dera, na su mama Beth, a cambio di $250.000 dollar. Finalmente e la acepta e suma di $25.000,= y despues lo a suministra informacion falso na e famia. E cargonan ta basa riba plan descubri via un total di 79 email entre e abogado di famia Hollloway (John Q. Kelly) y Joran mes. “Mi lo hibabo na Natalee, pero mi no kier pa e informacion a bin dimi” Joran a scirbi na 2010,  segun documentonan obteni. “A cambio mi kier $250.000,=”, Joran a bisa. E curpa sinembargo nunca no a wordo localisa. Si haye culpable, ta spera Joran un castigo di 25 aña di prison pa cada un di e 2 cargonan, esta estafa y fraude.