Gobernador: Sail Aruba oportunidad unico pa mira celebracion 200 aña Reino Hulandes

ORANJESTAD – Su Excelencia Gobernador Fredis Refunjol, a haci un invitacion na henter pueblo di Aruba pa bishita e evento di Sail Aruba, cual ta tuma luga e fin di siman aki den haf di Oranjestad.

Na aña 2013 a cuminsa cu e celebracionnan di 200 aña di existencia di Reino Hulandes y a combina e celebracion di 350 aña di Marina Real den e evento na Aruba cu a haya e nomber di Sail Aruba. “Como parti di Reino nos ta haya importante toch pa pone atencion na e celebracion aki; ya cu e hecho di pertenece na un Reino grandi ta duna nos garantia y beneficionan. Asina nos ta wordo representa door di un potencia, manera Hulanda, cu tin hopi influencia. Haciendo uzo di Embahadanan Hulandes por duna nos hopi mas beneficio .... Pesey pa celebra 200 aña ta bon pa para un rato keto y refleha riba esaki,” Gobernador Freddy Refunjol a expresa.

Gobernador den e declaracion duna a bisa cu a dicidi pa organisa un “Sail”. El a remarca cu awendia no ta uza barco di bela manera cu e tabata wordo uza antes, segun storianan cu el a yega di scucha for di piscadonan. E barconan di bela tabata encarga cu transporte di mercancia entre Aruba y Corsou. Y Hulanda semper a destaca den e sector di nabegacion. Pesey e tema aki a wordo considera como uno apropia, awa y lama, pa forma parti di e celebracion.

“E lo ta un evento unico,” Gobernador Refunjol a bisa yen di entusiasmo. E Opendag di Marinierskazerne a wordo combina cu e Sail Event, y lo expone hopi material cu nan a caba di ricibi for di Corsou. Haf lo ta dorna cu diferente tipo di nave maritimo, di Marina Real pero tambe priva. Entre nan ta b ay tin un Tall Ship “E ta algo cu ningun hende por perde, pasobra probablemente ta te aki 5 aña e lo wordo organisa atrobe,” e representante di Rey Willem-Alexander aki na Aruba, a duna di conoce. Comision Organisador ta masha contento na tur esnan cu a coopera pa realisacion di e evento aki. “Mi ta spera cu e presencia di pueblo lo ta hopi grandi, ya cu e lo ta algo unico,” y a agrega, e ta mas special ya cu Rey Willem-Alexander a mira e importancia di e union den Reino, kende a acepta pa presencia e evento den compania di su esposa Reino Maxima.