Polis a rescata tres persona indocumenta y saca 2 curpa di laman na Vader Piet

VADER PIET - Den bon coordinacion cu otro departamentonan, polis dialuna mainta tempran a logra rescata 3 persona na un boca na altura di Vader Piet. Polis no ta menciona e localidad den nan raportahe, pero ta conoci cu esaki tabata e sitio conforme un raportahe di e portal 24ora.com. Polis a menciona tambe cu 2 otro persona, tambe indocumenta  nan curpa tambe a ser saca for di costa. Alabez autoridad a haya basta bulto di droga y tur a wordo confisca.

Tabata awe mainta pa 08:15am cu personal di Fundacion Parke Nacional Aruba a bati alarma na Central di Polis cu un hende homber cu ta papia spaño a yega na un trahado di nan bisando cu madruga e la drenta Aruba ilegal y cu 2 di su compañeronan ta mal pega bou baranca. 

Mesora Central di Polis a cuminsa manda patruya, brandweer, personal di kustwacht y ambulans na e sitio. Na e sitio enberdad patruya ta informa cu nan ta wak dos hende homber bou di e baranca pero cu e situacion di e lama ta hopi malo y dificil pa nan mes rescata nan. 

Personal di helicopter di Cuerpo Policial a logra maniobra y saca e dos hombernan aki. Mesora e personal di helicopter a sigi busca y un poco mas panort ta wak 2 curpa sin bida ta drief y basta purun preto.

Pa e helicopter di polis tawata practicamente imposibel pa saca nan. Mesora personal di bombero den bon coordinacion ta logra baha y saca e dus curpa nan sin bida plus e purun cu probablemente tin droga aden. 

Bo por bisa den un bon coordinacion a usa tambe e helicopter di Kustwacht pa keda monitor e situacion for di lama. E 3 personan a wordo trata door di personal di ambulans y despues di tratamento nan a wordo deteni y hiba warda pendiente mas investigacion.  E purun nan tambe a wordo confisca y lo habrinan pa haci e testnan necesario pa wak ki sorto di droga tin den nan.