Bermudez: Segun Fitch situacion financiero Aruba no a deteriora

ORANJESTAD – Manera raporta ayera caba, Aruba a ricibi su rating di Fitch, cu tabata practicamente mescos cu na 2014.Segun e mandatario di Finanzas, e ratingnan aki di institutonan internacional manera Fitch, ta un bon indicacion si tur cos ta riba e ruta corecto of no, pues e rating y recomendacionnan semper mester wordo tuma na serio. “Semper tin espacio pa mehora, nos a consolida cu e rating anterior pues esaki ta significa cu e situacion financiero di Aruba no a detereora ”, Minister Bermudez a expresa. Ayera NoticiaCla.com a mustra cu enberdad si compara cu na 2013, Fitch e la duna Aruba un rating di BBB pero cu un outlook negativo, esey a cambia na 2014 pa uno 'stabil'. Pues pa e parti di e perspectiva, tanto na 2014 como 2015 e ta conoce un mehoracion chikito. Esey no ta kita afo cu Fitch ta subraya su puntonan cu Aruba tin cu tene cuenta cune sino por spere problema serio. 

RATING BBB-

E ‘ratings’ di Fitch cu a cualifica Aruba como ‘BBB-‘. Esaki ta indica cu e expectativa di riesgo ‘non-payment’ ta abou mientras cu e capacidad di pago di compromisonan financiero ta wordo considera adecua, sin embargo condicionnan economico por afecta e capacidad aki.

PARTIDONAN POSITIVO

Segun Bermudez, algun di e factornan cu peso pa e ‘rating’ positivo aki segun e expertonan di Fitch ta entre otro, e crecemento di e PIB real cu un 1,1% den 2014, pues nan ta spera tambe un crecemento aproxima di 2% den 2015 y 2016, cu tambe ta cuadra cu e prevision di Banco Central y Ministerio de Finanzas tambe. Sin laga afo tambe e crecemento di e divisanan cu un 8.5% danki na e sector turistico. Fitch no por a laga un banda e reforma di pensioen cu e tuma luga aña pasa cu a mehora e sostenibilidad di Aruba su finanzas publico pa un termino largo.

IMPORTANTE

E loke cu tabata importante y factornan determinante segun Fitch, ta e intencion ambicioso fiscal di Aruba pa logra un presupuesto zero deficit pa 2018, den un intento pa stabilisa e debe di gobierno, (cu Fitch ta raporta a pasa 62% di GDP y casi 80% di GDP riba un base bruto na 2014). Fitch ta premira cu enberdad lo reduci e deficit, pero cu no lo yega e plan stipula. Nan ta premira cu e deficit lo reduci un punto di porcentahe na 2015, compara cu e posicion di 5.2% di GDP na 2014. E risico di implementacion di medida di gobierno ta pone cu e metanan ta dificil pa wordo logra segun Fitch.

STRATEGIA

Fitch ta señala e cambio di strategia di prome minister Mike Eman for di e prome gabinete. Tambe ta repasa tur e loke cu gobierno a haci pa mehora e situacion y e medidanan tuma pa yega na e meta aki.  Mes momento tambe e ta reconoce e beneficio di Aruba di ta parti di un miembro di Reino Hulandes. Ademas e ta reconoce cu autoridad hulandes por eherce influencia riba e politica di Aruba, y ta referi aki na henter e episodio di CFT, gobernador y e falta di firma presupuesto.

Fitch ta premira un crecemento cerca di 2% na 2015 y 2016, cu ta cuadra cu e pronostico di Banco Central y minister di finanza. Di otro banda e ta ainda bou di e cifra di BBB cu ta 3.2%. Turismo a crece cu 5.3% cada aña mientras cu importacion a cay. E debe externo ta deteriorando mientras cu Aruba ta depende mas y mas riba fiansa externo pa por paga su debe y e deficit fiscal. (lesa e rapport completo aki)