Pareha Real a yega Bonaire pa celebra Dia di Rincon

KRALENDIJK – S.M. Rey Willem Alexander y Reina Maxima a yega Bonaire diaranson anochi, y lo ta presente awe pa celebra Dia di Rincon. Cu e bishita aki, e deseo di gezaghebber di e isla Edison Rijna ta wordo cumpli. E deseo tabata pa dentro di un aña di su funcion como prome mandatario di e isla, logra trece e pareha Real Bonaire. E isla ta den un situacion ‘fastioso’ unda cu tin cu celebra un dia cu oficialmente no ta liber, pero toch tin cu demostra nan amor pa nan isla.

DIA LIBER!

For di siman pasa a bira conoci cu e isla lo por ‘coopera’ pa por duna trahadonan liber toch pa por celebra e dia y presencia e bishita di e pareha Real. Entre nan, scolnan lo ta sera awe, y banconan y oficinan di gobierno ta sera. Esaki ta contra e palabracion cu minister hulandes Ronald Plasterk cu a mustra cu no por duna liber legalmente e aña aki. Pero manera por mira, esaki a wordo regla localmente di tal forma cu un grupo grandi di boneriano toch por celebra e fecha importante aki.

RINCON

Rincon ta situa den e parti norte di e isla, y ta e prome ciudad di e isla, y como tal su importancia ta grandi y a haya su dia special. E dia aki pa añanan largo tabata celebra hunto cu e ‘aña di la Reina (Juliana y despues Beatrix), riba 30 di april. E aña aki esey no ta e caso mirando cu e fecha di dia di Rey ta cay riba un otro fecha.

ARUBA

Pa loke ta e pareha Real, nan lo bandona Bonaire awe nochi laat, y yega Aruba pa mayan participa den e evento grandi Sail Aruba 2015. Nota: Foto di archivo di ANP di e bishita di pareha real na Bonaire na 2013.