KPA: Te ainda no a caba solucion accidente fatal di Pos Chiquito

ORANJESTAD - E investigacion di Polis, relaciona cu e accidente fatal cu a sosode dia 13 di maart ultimo no ta completamente cla ainda, aunke e ta bastante avansa si. Departamento di Trafico di Cuerpo Policial Aruba hunto cu Lands Recherche bou supervision di Ministerio Publico ta kedando cla cu e investigacion, pa por tuma un decision riba ki paso lo tuma.

E ACCIDENTE

E accidente a sosode diabierna den oranan laat di atardi na altura di Pos Chikito, ora cu un auto, maneha pa un civil na Polis den su tempo liber, a alcansa un mucha. Su mañan e victima Zinnia Croes a fayece na Hospital debi na e sla nan ricibi. Investigacion na e sitio mes a demostra tambe cu e chauffeur tabata bou influencia di alcohol, o sea a surpasa e nivel di alcohol den su rosea, ora a haci test cune na e sitio di accidente y despues tambe na Warda di Polis.

INVESTIGACION

Den tipo di casonan asina, ta start un investigacion riguroso den cual e ekipo forensico di Polis ta investiga tur detaye di e auto, riba caminda, ta scucha testigonan cu a mira e accidente sosode y ta interoga esunnan envolvi directamente pa na final hinca tur esey den un Proces-verbaal cu ta bay na Ministerio Publico. Pero prome cu esey tur detaye mester ta bon investiga, cu tin biaha hasta ta rekeri testnan cu mester bay te laboratorio hudicial na Hulanda y regresa. Ta pesey tin biaha e tipo di investigacionnan asina por tuma mas tempo cu normal.

POLIS

Den e caso specifico aki, como cu e chauffeur di e auto ta un Polis, a envolvi Lands Recherche den e proceso pa por garantisa tur partido envolvi cu ta mantene e mesun nivel di transparencia y neutralidad necesario, teniendo cuenta cu e hechonan, den cuadro di e investigacion penal andando.

EXPERIENCIA

Cuerpo Policial ta sigura cu e departamento di Trafico di Polis tin e ekiponan, e experiencia y e conocemento necesario pa por atende tipo di investigacionnan asina, pa por yega na un resultado final den cual a investiga tur aspecto di e accidente cu lamentablemente tabatin un resultado fatal.