Premier Wever personalmente no por compronde pakico Hulanda no kier duna kwijtschelding na Aruba

ORANJESTAD – Mientras cu Gobierno di Aruba ta ‘los’ di Parlamento y no ta controla loke cu Parlamento ta bisa, premier Evelyn Wever personalmente si ta sostene e pensamento di e delegacion di Parlamento na IPKO (lesa: sra Shailiny Tromp-Lee) riba e asunto di debe cu Aruba tin cu Hulanda y e pensamento cu Aruba mester por haya un tipo di ‘kwijtschelding’. Asina premier Evelyn Wever a bisa Noticiacla dialuna mainta durante e conferencia di prensa di prensa. “Bo puntrami personalmente, mi ta haya, mi no por compronde y mi no por splica na ciudadanonan di Aruba, pakico Hulanda no kier duna kwijtschelding di parti di e debe na Aruba” Wever Croes a contesta. “Pero como gobierno, mi a ripara cu esaki ta, bo mencione den negosacion, portanan ta cera di tur banda riba bo. Kier men nos a dicidi cu nos no ta bin cu e punto aki nan mas na mesa por lo pronto” Wever Croes a sigui bisa. 

NEGOSACION TA BAYENDO BON

Contrario na palabra di parlamentario Shailiny Tromp Lee, cu a bisa na reunion di IPKO, cu e combersacionan entre Hulanda y Aruba no ta bayendo bon, e prome mandatario a sigura cu ‘nan ta bayendo bon’.”Nan ta bayendo bon, nan ta bayendo. Mi por bisabo cu nos ta na mesa cu Hulanda, nos no a sali afo ainda. Nos tin un oferta di Hulanda riba mesa y nos ta haciendo nos calculacionan. Tin diferente scenario. Ora cu e scenarionan ta calcula, IMF mester calcula un parti pa nos ainda, e ora nos lo presente tambe na comunidad ya tur hende sa kico e ta encera”. E mandatario a confirma cu e proceso ta tumando su tempo y cu Hulanda ta insisti cu e mester di e rijkswet pa por yega na un refinanciamento mas faborabel pa Aruba”. 

PARLAMENTO SU PUNTO TA VALIDO

Personalmente, Wever Croes a comparti cu e punto di Parlamento ta valido. “Loke cu Hulanda ta pidi di Parlamento ta, pa kita un autoridad cu awor ta di parlamento dune na Rijksministerraad, anto ya Parlamento no ta deal cu ne mas. Esta e supervision financiero, pero Rijksministerraad ta deal cu ne. Pero Rijksministerraad no a haci mucho bon trabou di dje ultimo tempo tampoco, laga nos ta hopi honesto cu esey” Wever Croes a sigui bisa.