- Wever Croes: Lo sinta cu TOPA riba Prestatie Management Sisteem dentro e tempo stipula
- DOW: Ta habri caminda bek na Palm Beach fin di October!
- Oduber: Cifranan di AAA ta indica cu tin un demanda fuerte pa Aruba
- Carchi ta cabando pa wak comediante Marko en bibo na Aruba
- Veld nobo di stadion Guillermo Prospero Trinidad ta wordo evalua awor
Publico por vota pa e candidatonan pa Appeltje van Oranje 2023
ORANJESTAD - For di 31 mei, públiko por vota riba e 38 proyektonan ku ta kandidato pa un Appeltje van Oranje. E proyekto ku logra akumulá mas tantu voto lo pasa mesora pa e ronda di dies finalista. Tur aña, Oranje Fonds ta otorgá Appeltjes van Oranje na proyekto sosial eksepshonal ku ta di importansia pa hende den nos komunidat. E aña akí, pa di promé bes lo por vota tantu pa proyekto di Hulanda komo di e parti karibense di Reino. E aña akí, e proyektonan partisipante ta di Aruba, Boneiru i Kòrsou. Votashon ta keda habrí te ku dia 9 di yüni, na stem.oranjefonds.nl.
E AÑA AKÍ, TEMA DI APPELTJES VAN ORANJE TA FASILITADÓ/INTERMEDIARIO DEN BARIO.
Esei ta nifiká ku e premionan di e aña akí lo bai pa inisiativa ‘di habitante di bario pa habitante di bario’ ku ta fomentá kontakto entre bisiña di bario ku di otro manera no sa topa otro. Oranje Fonds a skohe e tema akí pa e edishon di 2023 mirando ku e tipo di inisiativa akí ta indispensabel pa nos komunidat. E tipo di proyektonan akí ta importante. I mirando sierto desaroyo den komunidat, nan ta birando asta mas importante.
KRUSIAL
Por ehèmpel, kontakto entre bisiña di bario ta sufriendo komo konsekuensia di individualisashon i embehesimentu. Ademas, e barionan ta birando mas i mas diverso i, debí na esei, orígen, edat i estilo di bida di e habitantenan ta kada bes mas divergente. Fuera di esei, tabatin hopi kòrtamentu di gastu, a kosto di e sitionan kaminda hende ta topa otro i di otro maneranan pa fortifiká nos komunidat. Pero konekshon entre hende ta krusial pa por tin un komunidat kaminda e habitantenan di bario ta sinti un kompromiso ku otro, ta buska drechi di otro i ta kuida otro i nan bario. Kontakto sosial entre e habitantenan di un bario ta sirbi komo un reda di siguridat pa tur ku por tin mester di dje. Tambe, e kontaktonan akí ta sirbi komo un base importante pa kombatimentu i prevenshon di problema manera soledat, pobresa i konflikto entre hende.
TRES APPELTJE
E 38 inisiativanan ta uni e habitantenan di un kantidat di bisindario den Reino. Aunke esei ya kaba ta un prestashon eksepshonal riba su mes, ta tres Appeltje van Oranje so por otorgá. E kantidat di voto ku e kandidatonan haña lo yuda determiná ken lo pasa pa e buèlta di dies finalista. En todo kaso, e proyekto ku akumulá e mayor kantidat di voto lo pasa. For di e dies finalistanan, un hurado lo skohe tres ganadó.
REINA MÁXIMA
Na òktober, Reina Máxima, patrosinadó di Oranje Fonds, lo entregá e premionan. E tres ganadónan lo risibí un figura di bròns, obra di Prinsesa Beatrix, i un suma di 25.000 euro.
ORANJE FONDS
Pa Oranje Fonds, un i tur ta konta. P’esei, nan ta traha pa un komunidat den kual un i tur por partisipá i niun hende no ta keda desampará; un komunidat di kompromiso mutuo, kaminda nos ta duna otro un man, kaminda hende tin oportunidat igual i ta sinti ku nan tin un konekshon ku e otro habitantenan di bario. Oranje Fonds ta hasi esaki apoyando esnan ku ta tuma inisiativa i poniendo nan den kontakto ku otro semper ku por. Esaki ta posibel, entre otro danki na apoyo di de Nationale Postcode Loterij, de Nederlandse Loterij, Vrienden i diferente otro partner. Rei Willem-Alexander i Reina Máxima ta e patrosinadónan di Oranje Fonds. NOTA: E texto a wordo scirbi den papiamento fonetico di Corsou.
Hasta den restante di wega suspendi, Feyenoord ta superior riba Ajax y ta gana 4-0 na Hulanda
AMSTERDAM – E ekipo di futbol professional Hulandes Feyenoord a haci e crisis den Ajax mas grandi ainda diaranson. E ekipo di Rotterdam a cuminsa e wega suspendi diaranson merdia (ora di Hulanda) cu e delantera di 3-0 y den apenas un par di minuut, a aumenta e score na 4-0 den un stadion sin publico. E partido tabata un continuacion di esun di diadomingo cu a keda suspendi ora cu fanaticonan a tira vuurwerk riba tereno. A suspende e wega e ora faltando 35 minuut di wega. Awe e wega a sigui y a hunga e restante di tempo, pero esaki no tabata beneficioso pa Ajax cu a sufri un derota historico contra su rival di tur tempo. Te cu awor, nunca Feyenoord a gana di Ajax cu mas di 2 gol di diferencia. Tabata na 1987 cu e club a gana dos biaha tras di otro di Ajax, na Amsterdam. Cu e derota aki, despues di 5 partido Ajax ta na di 14 lugar y ta su temporada di mas malo den 60 aña cu solamente 1 victoria te awor.
Artista Marco Borsato ta wordo persigui pa abuso di menor di edad
AMSTERDAM – E artista Hulandes Marco Borsato ta wordo persigui pa abuso di un mucha muher menor di edad. E cantante di 56 aña ta wordo sospecha di a mishi cu e persona segun Ministerio Publico. Na December 2021 e muher cu awor tin 22 aña di edad, a entrega keho contra e artista. Ora cu e incidente a tuma lugar, e victima tabatin 15 aña. Ta trata di yiu muher di un ex trahado di Borsato. E abuso lo a dura añanan largo y a cuminsa ora cu e persona tabatin 15 aña. A bisa cu e caso ta haya preferencia riba otro casonan di abuso di menor. E abogado di e artista ta lamenta e situacion y ta sigura cu su cliente ta inocente y cu esaki ta un intento mas pa difama su cliente.
Ajax no ta bay corte mas. Wega suspendi di futbol contra Feyenoord ta sigui diaranson
AMSTERDAM – E ekipo professional di futbol Hulandes Ajax no ta bay corte mas pa forza e federacion di futbol KNVB pa stop e wega di diaranson contra Feyenoord. E wega suspendi diadomingo, lo continua awor diaranson manera cu a keda anuncia, pero sin publico. E wega diadomingo a keda suspendi despues di a hunga 55 minuut ora cu pa di dos biaha a tira vuurwerk riba e tereno. Feyenoord tabata gana 3-0.
Schiphol a haya permiso pa ehecuta 500 mil buelo maximal
DEN HAAG – Minister pa naturalesa y nitrogen, a duna Schiphol diamars un permiso di naturalesa. Esey ta nifica cu Schiphol ta haya permiso pa ehecuta entre 440 pa 500 mil buelo maximo. Asina e minister demisionario Van der Wal a bisa. Cu e permiso di nitrogen, a resolve un parti di e problem huridico rond di aeropuerto. Entrante 1 di November 2024 mester tin 20% menos zonido di avion. Aunke cu a declara e asunto uno controversial, toch e minister a dicidi di duna permiso, pasobra e ta haya cu no por haci otro si tur condicion a wordo cumpli cu ne.
Scolnan primario na Hulanda ta haya extra siman pa trahha toets, pa por celebra carnaval
DEN HAAG – Scolnan primario na Hulanda ta haya 3 siman di tempo pa traha nan asina yama ‘doorstroomtoets’, pa wak ki scol secundario nan ta bay. Debi na e extra siman, e alumnonan por participa na actividadnan tradicional manera carnaval. E toets tabata planea pa e prome simanan di februari. E periodo di Carnaval ta cuminsa dia 11 di februari y na scolnan hopi biaha for di dia 8 caba. Awor e toetsnan ta dura di 29 di januari pa 18 di februari. Scolnan mes por dicidi ki ora y cua parti di dia nan ta traha e toetsnan. E ta conta solamente pa toetsnan digital.
KNVB: Wega suspendi entre Ajax y Feyenoord na Hulanda, ta sigui diaranson awor
AMSTERDAM – E resto di wega di futbol suspendi diadomingo entre Ajax y Feyenoord, conoci como e wega classico, ta sigui diaranson atardi 2’or ora di Hulanda. Un wega cu ta hopi popular entre amantenan di futbol na Aruba. Asina e federacion Hulandes di Futbol KNVB a anuncia dialuna mainta. E wega a keda suspendi diadomingo debi na vuurwerk riba tereno cu a desemboca despues den violencia di e manifestantenan conoci como Hooligans. Sinembargo tanto Ajax como Feyenoord ta evaluando pa demanda KNVB den corte, pasobra nan no ta di acuerdo cu e decision tuma. Ajax tin un wega programa cu otro ekipo, cu ta FC Volendam.
Follow NoticiaCla
