Calor intenso y holor stinki di Dump y Ser’i Theisi a afecta barionan

Calor intenso y holor stinki di Dump y Ser’i Theisi a afecta barionan

Posted on 06/4/2023 8:24 pm AST | Updated on 06/4/2023 8:35 pm AST

ORANJESTAD - Durante e dia di diadomingo y diasabra Aruba henter a sinti e cayente di e calor intenso di mas di 32 grado Celsius y sin biento. Sinembargo pa e habitantenan di barionan di Mahuma, Buena Vista, Parkietenbos y Simeon Antonio mester a soporta mucho mas molester, fuera di e calor sofocante. 

Pa motibo cu biento a cay y a cambia di direccion,  un holor stinki di e Dump di Parkietenbos a drenta den e casnan di barionan, pero tambe un holo diferente cu tambe ta hole malo di Ser’i Teishi, a afecta e famianan di e barionan menciona. Apesar cu e dump di Parkietenbos ta cera, e ta emitiendo un holor vies y huma cu ta sali y afecta e bida di habitantenan, hende grandi y mucha ta wordo mas afecta cu alergia, astma y hopi dolor di cabes. Varios ta e famianan cu a dicidi di sali di e bario durante dia pa evita di wordo afecta pa e holor y gas toxico cu a sali di e sitionan menciona. Otronan a cera nan mes den cas, pone serbette muha na e porta y bentana pa evita cu e holor malo ta drenta paden di cas. Segun e habitantenan ta informa, durante di e ultimo reunion cu e Minister di medio ambiente Sr. Ursell Arends y su conseheronan, nan e urgi e Minister pa cera e operacion di Ser’I Teishi tambe mas pronto cu ta posibel. Nan ta bisa cu nunca e habitantenan a aproba pa bin cu algo asina den area parti pariba di nan casnan na Ser’i Teishi, e ta algo totalmente incorecto. Segun esnan di Stichting Parkietenbos, Ser’i Teishi tabata suppose di tabata algo temporal na momento cu cera e dump pa despues bay over un Sanitary Landfill moderno y despues sigui pa un proceso pa procesa tur desperdicio cu ekiponan moderno cu efecto minimo pa medio ambiente y genera coriente alabes.  Pero segun e ciudadaonan, ta parce cu awor nada di e plannan anuncia ta wordo ehecuta. Mas bien Ser’i Teishi ta birando e siguiente fuente di molester y sufrimento pa e habitantenan di e barionan concerni y tambe pa Aruba. Diadomingo e holornan malo a bolbe yega te na Aeropuerto di Aruba y hustamente den oranan di merdia na momento cu un cantidad di buelo cu bishitantenan ta yega y bay di nos isla

  • Postobon
  • Powered by SETAR