Fitch: Aruba ta mantene su BBB- rating y perspectiva stabil

NEW YORK – Aruba ta mantene su BBB- rating y perspectiva (outlook) stabil, manera cu e tabata den 2014. Fitch Ratings a publica su rating pa pais Aruba awe merdia, y a duna e rating menciona. Na 2013 e la duna Aruba un rating di BBB pero cu un outlook negativo. Pues tanto na 2014 como 2015 e ta conoce un mehoracion chikito. E loke cu tabata importante y factornan determinante segun Fitch, ta e intencion ambicioso fiscal di Aruba pa logra un presupuesto zero deficit pa 2018, den un intento pa stabilisa e debe di gobierno, (cu Fitch ta raporta a pasa 62% di GDP y casi 80% di GDP riba un base bruto na 2014). Fitch ta premira cu enberdad lo reduci e deficit, pero cu no lo yega e plan stipula. Nan ta premira cu e deficit lo reduci un punto di porcentahe na 2015, compara cu e posicion di 5.2% di GDP na 2014. E risico di implementacion di medida di gobierno ta pone cu e metanan ta dificil pa wordo logra segun Fitch.

Fitch ta señala e cambio di strategia di prome minister Mike Eman for di e prome gabinete. Tambe ta repasa tur e loke cu gobierno a haci pa mehora e situacion y e medidanan tuma pa yega na e meta aki.  Mes momento tambe e ta reconoce e beneficio di Aruba di ta parti di un miembro di Reino Hulandes. Ademas e ta reconoce cu autoridad hulandes por eherce influencia riba e politica di Aruba, y ta referi aki na henter e episodio di CFT, gobernador y e falta di firma presupuesto.

Fitch ta premira un crecemento cerca di 2% na 2015 y 2016, cu ta cuadra cu e pronostico di Banco Central y minister di finanza. Di otro banda e ta ainda bou di e cifra di BBB cu ta 3.2%. Turismo a crece cu 5.3% cada aña mientras cu importacion a cay. E debe externo ta deteriorando mientras cu Aruba ta depende mas y mas riba fiansa externo pa por paga su debe y e deficit fiscal. (lesa e rapport completo aki)