Albatros Airlines ta opera oficialmente na Aruba

ORANJESTAD – E aerolinea cu antes tabata asisti nos aerolinea local Tiara Air, Albatros Airlines, awor a dicidi di bula riba su mes y establece su mes asina na Aruba. Tabata durante un fiesta cocktail teni den e Non-US Plaza di Aeropuerto di Aruba dilanti di e oficina nobo di Albatros Airlines, Aruba Airport Authority N.V. (AAA) oficialmente a yama bon bini na e aerolinea cu ta existi 7 aña caba. Nan ta bulando 3 biaha pa dia for di Punto Fijo Venezuela pa Aruba cu un avion di 12 pasahero, pero tin intencion di expande esaki den futuro.

AOC

E compania mes, a wordo funda dia 27 di December 2007 y a ricibi nan Airline Operating Certificate (AOC) for di e Instituto Nacional di Aviacion di Venezuela riba 13 di Mei 2010. E AOC ta autoriza e aerolinea pa brinda servicio aereo domestico y internacional comercial pa pasahero, cargo y post for di Venezuela. E aerolinea tin varios operacion di charter internacional incluyendo buelo pa Aruba, Curacao, Barranquilla-Colombia, Trinidad y Haiti entre otro.

OPERACION PA ARUBA

Mientras cu e siman aki nan a presenta nan mes oficialmente na publico, Albatros Airlines a inicia nan operacion pa Aruba independientemente for di december 2014. Nan ta opera 3 buelo diario for di Aruba pa Las Piedras cu ta sali 09:30, 14:30 y 16:30. Nan flota cu ta wordo usa pa nan servicio pa Aruba ta consisti di un Cessna 208 (12 pasahero) y un Embraer cu capacidad pa transporta 30 pasahero.

MONTILLA

Sr. Carlos Montilla, CEO di Albatros Airlines tabata contento pa anuncia cu e aerolinea tin plan grandi pa futuro. E plannan aki ta inclui destinacionnan nobo cu lo wordo anuncia pronto. Recientemente, e aerolinea a cumpra 2 avion Boeing pa aumenta su flota pa asina mejora y expande nan network di servicio aereo.

AAA su CEO Sr. James Fazio tabata contento di por yama bonbini na e aerolinea chikito den nan oficina nobo situa na aeropuerto y a expresa cu e ta spera cu e partnership cu Albatros lo yuda desaroya servicio adicional den e futuro sercano.

E potretnan ta ilustra e evento festivo cu a tuma lugar na aeropuerto pa asina yama Albatros Airlines bon bini.