Mike Eman : Hulanda a menasa gobernador

ORANJESTAD – Gobernador lo a wordo menasa cu prison si e firma e presupuesto. Esaki ta e splicacion cu lider di partido AVP, Mike Eman a duna su seguidornan diamars anochi na e cede di partido durante reunion di partijraad. “Ora cu gobernador a informami loke a pasa, mi no a pensa otro cu nos mester para banda di dje” Eman a bisa su seguidornan. Gobernador mientrastanto (manera cu NoticiaCla a raporta caba) a biaha pa Hulanda pa discuti e situacion actual di Aruba cu Gobierno di Reino. Ningun momento den su declaracion, e ta haci mencion di un of otro menasa, sino solamente ta informa cu e motibo ta netamente pa purba resolve e impasse, pa bienestar di Aruba. Den curso di diaranson, ta spera di tin mas informacion riba e informacion cu Eman a anuncia na su hendenan durante reunion di partijraad. UPDATE: NoticiaCla a haya informacion fidedigno diaranson mainta cu e noticia cu gobernador lo a wordo menasa,no ta berdad. Loke si ta berdad, segun e fuente, ta cu gobernador no por firma e presupuesto sin autorisacion di Hulanda. E la wordo mas bien recorda cu e tin cu tene su mes na e palabracion di e KB. Pero no ta asina si, cu gobernador a wordo menasa cu castigo di prison. "Esey si no a sosode", e fuente a confirma na NoticiaCla diaranson mainta.