DTP: No tin suficiente prueba cu taxista a maltrata turista

ORANJESTAD - Tin indicacion cu no tin suficiente prueba cu berdaderamente un maltrato a tuma lugar entre taxista 419 y un turista venezolano. Departamento di transporte publico (DTP) a bisa awe cu investigacion ta mustra cu ta trata di palabra di e turista contra esun di e taxista. Tambe DTP a bisa cu debi cu ta trata di un otorgamento di permiso di taxi bastante recien, DTP a tuma nota cu den medionan di comunicacion a cuestiona cu e screening di e taxista masculino no a bay debidamente y cu a otorga permiso na un persona cu tin un adiccion.

REMARKE PA PERMISO

DTP tin di remarca cu tur persona cu ta bin na remarca pa ricibi un permiso pa taxi of otro tipo di permisonan cu ta resorta bou di DTP, tin di cumpli cu e exigencianan manera stipula den e ley prescribi, e.o. drugstest.

INVESTIGACION CONDUCI

DTP a conduci un investigacion y a yama e taxista masculino paden pa un declaracion di su parti. E taxista masculino e desmenti categoricamente cu el a maltrata un turista femenino Conforme informacion ricibi di polis en berdad nan a haya un melding mas o menos 4’or di marduga pa un supuesto maltrato di un turista femenino dor di un taxista masculino. Polis di Noord a presenta na e sitio di incidente y a conseha e turista di nacionalidad Venezolano cu si e kier entrega un keho/ denuncia e mester haci esaki na un warda di polis of oficina di recherche. Di parti e dos turistanan masculino nada a wordo menciona.

TURISTA VENEZOLANO

Mientras tanto DTP a confirma cu e turista Venezolano a bandona nos isla y no ta sigur si el a entrega un denuncia na warda di polis.

DTP ta remarca cu e departamento t’ey pa sirbi comunidad en general es decir tanto usuarionan di transporte publico como vergunninghouders cu ta cay bou di e leynan di transporte publico. DTP ta cumpli cu su tareanan di controla y vigila transporte publico lo mehor cu e por, pero tin caminda cu otro instancianan mester wordo envolvi, manera den e dos casonan aki, polis. En todo caso, DTP ta para pa su credibilidad y di tur esnan envolvi den casonan cu e departamento mester atende cu ne.