Na Corsou, partido di coalicion PNP no ta usa credit card di 25 mil dollar!

WILLEMSTAD - E tres ministernan di Partido Nashonal di Pueblo (PNP) no a aseptá e “credit card” (tarheta di krédito) di 25 mil dòler. Esaki ta loke ku kada un dje ministernan a duna di konosé na prensa. Segun nos a komprondé ku tur e tres ministernan di PNP for di komienso no tabata di akuerdo ku e asuntu di tarheta di krédito aki, i no a vota pro esaki. Pero tòg ta keda na kada minister si ta asept’é.

Djaluna a habri ku e notisia ku for di dia 9 di mei último, Konseho di Minister a bai di akuerdo pa kada ministernan haña un “credit card” ku e suma di 25 mil dòler ariba pa kada un biahe ku e hasi ku su delegashon.

Di akuerdo ku e lider di partido PNP, sra. Ruthmilda Larmonie-Cecilia, el a vota kontra di proposishon aki. Pasobra e tarheta di krédito lo ta riba su nòmber. E tarheta di krédito ta keda den ministerio, e gastunan hasi kuné tambe ta su persona tin di karga responsabilidat p’esaki. Sra. Ruthmilda Larmonie-Cecilia a bisa ku e si no ta dispuesto pa karga responsabilidat di otro. P’esei e no a tuma e tarheta di krédito, i ta sigui via di e sistema ku semper su ministerio tabata regla asuntu di biahenan pa eksterior.

Minister Ruisandro Cijntje di PNP di su parti a bisa ku nunka el a apliká pa e tarheta di krédito, pues e tambe ta sigui ku e sistema di areglo di biahe pa su ministerio manera ta hasiendo kaba.

Igualmente minister Ornelio “Kid” Martina a bisa ku ta un liña tin den partido i ta sigui e liña di e lider, ku ta sra. Larmonie-Cecilia. Pues sr. Martina tampoko lo hasi aplikashon pa e tarheta di krédito.

Ta basta konmoshon e notisia aki a kousa den komunidat, i hopi hende no ta kere e historia di minister Silvania ku ta gastu ke baha ku e sistema aki.

Minister di finansa sr. Javier a argumentá e desishon pa usa e tarheta di krédito, ku ora kumpra un ticket pa Ulanda “business class” ku KLM via di agensia di biahe e ta sali alrededor di 9635 florin, pero ‘online’ esaki ta kosta 7005 florin, kual ta 37,5% mas tantu. Ku e tarheta di krédito lo baha gastu di biahe ku 1,2 mion florin pa aña, i ta pidi ministerionan pa kumpra ticket ‘online’, i asina baha gastu. Minister Silvania a para riba ku ta pa baha gastu e tarheta di krédito ta. Tambe e tarheta di krédito ta sirbi pa usa na hotèlnan i kompanianan di hür outo. NOTA: E texto ta scirbi den Papiamento fonetico di Corsou.