Caso sumario juffrouw Suki contra minister ta na mei

ORANJESTAD – E caso sumario cu e maestra di Scol Basico Kudawecha, -juffrouw Suhail “Suki” Croes-, a entama contra minister Michelle Hooyboer ta tuma lugar dia 11 di mei proximo. Esaki NoticiaCla.com a haya confirma awe mainta. E abogado cu lo trata e caso aki ta mr Hendrik Croes. E motibo di e caso aki, ta basicamente pa revoca e carta di suspension cu tin colga riba cabes di Suki Croes.

CARTA DI SUSPENSION

Manera ta conoci, na maart ultimo e juffrouw a wordo confronta cu un carta di suspension, basa riba su actuacion contra un mayor di un alumno di dje. E carta a indica cu basa riba informacion acumula, e juffrouw ta keda suspendi pa 5 dia, pendiente un investigacion. E suspension sinembargo nunca no a tuma lugar debi cu e persona en cuestion tabata AO.

BEK NA SCOL

Mientrastanto parlamento a trata e caso aki cu minister encarga cu na final di e tratamento, a dicidi di wanta e carta di suspension, y mes momento permiti e juffrouw di bay scol bek, pendiente e investigacion. E no a haya su klas bek si, sino mas bien a wordo re aloca na e scol mes. Ora cu e AO di e juffrouw a termina, e la cuminsa scol bek, pero e carta ta sigui colga riba cabes di e juffrouw. Y ta esey ta loke cu e abogado di e juffrouw ta bay purba logra bari for di mesa. Fuera di e caso aki, tin un bodemprocedure na caminda unda cu tin cu evalua henter e proceso y su legalidad.