Venezuela ta reduci horario di trabou debi na calor inmenso

CARACAS – Ta asina calor na Venezuela, cu ambtenaarnan por lo pronto tin cu traha solamente durante oranan di mainta. No pasobra fisicamente nan lo no por cu e calor, sino pasobra no tin suficiente coriente pa airco ta sendi tur caminda. E ta un medida cu gobierno a anuncia ayera, pa evita apagon. Algo cu ta sosode bastante regular. Na 2012 y 2013, e pais a sufri dos apagon grandi.

EVITA APAGON

Pa evita un apagon nobo, of por lo menos reduci esaki considerablemente, e ambtenaarnan tin cu cuminsa traha for di 7’or y mei y por bay cas ya for di 1’or di merdia. Normalmente nan tin cu labora 8 pa 9 ora pa dia. Tambe gobierno a pidi pa empresanan baha man na uso di electricidad. Sinembargo e grupo mas grandi di usuario di coriente, ta netamente e ciudadanonan mes. Pa scolnan, hospital, companianan di petrolio y companianan di seguridad, e medida aki no ta conta. Hotelnan y centronan comercial ta wordo vigila di serca. No ta conoci con largo e medida nobo aki lo ta na vigor.

.