Van Huffelen: Hulanda no sa ainda pakico Aruba ta contra e concepto di RAFT

DEN HAAG – Ta mustra cu tin un problema di comunicacion entre Aruba y Hulanda pa loke ta e tema di ley di reino di supervision financiero, conoci como RAFT. Dos luna premier di Aruba a bisa cu Hulanda ta na mesa cu Aruba pa negosha riba e tema. Y ta conoci cu Aruba tin problema cu e ley. Sinembargo awe diabierna mainta, a resulta cu Aruba ainda no a informa Hulanda kico e problema ta. “Gobierno di Aruba mester informa nos riba esey ainda” secretario di estado Hulandes Alexandra van Huffelen a bisa Noticiacla diabierna mainta den un entrevista cortico cu e mandatario. Pues mientras cu ta negoshando, toch ainda Hulanda no sa kico e problema pa cual Aruba no kier acepta e ley aki, ta. E ley ta condiciona na refinanciamento di e debe di Covid cu Aruba mester paga Hulanda bek e aña aki y ta algo cu Aruba a admiti dos luna pasa tambe. “Nos a palabra anteriormente cu nos ta bay traha un ley di Reino pa supervision financiero, y e reaccion di Aruba no a wordo manda pa nos (ainda)” van Huffelen a bisa. “Mientrastanto nos a informa nan tambe cu nos no solamente ta haya cu e ley mester bin, pero cu e ley ta condiciona na palabracion riba refinanciamento di e sosten di likidez” van Huffelen a bisa. Lamentablemente, Aruba segun e mandatario, on a informa Hulanda nada.“Pero riba esey, Aruba ainda tin cu informa nos ariba” e mandatario a finalisa bisando. 

LAFT

For di comienso, Aruba a laga sa publicamente cu e ley no ta conta cu aprobacion di Aruba, unda cu supuestamente e ta mina e autoridad di Parlamento di Aruba. Ademas, a duna otro motibo, pakico Aruba no kier e RAFT. Pero awor ta resulta cu pa Hulanda, no ta conoci pakico Aruba tin e ley wanta. 

NEGOSHANDO AINDA

Na fin di maart ainda premier Wever Croes a declara cu Aruba no ta sinti cu ta necesario pa tin un ley di RAFT, pero Hulanda si ta sigui insisti. “Riba e tema aki nos ta na mesa ainda” prome minister Evelyn Wever a declara e biaha ey\ den un conferencia di prensa, confirmando asina cu riba e tema aki ainda Aruba y Hulanda no a haya otro. Mes momento e mandatario a confirma tambe cu e asunto aki ta acopla na e pago bek di debe cu Aruba tin cu cumpli cu ne na October di e aña aki. 

NEGOSACION UN SIMAN DESPUES

Ademas e mandatario a bisa cu na comienso di April, Aruba lo tabata continua na mesa cu Hulanda durante e bishita di e mandatario (pa e.o. firma e Onderlinge Regeling tambe unda cu si tin acuerdo) hunto cu su colega Maduro cu e negosacionan pa loke ta e RAFT, cu intencion di logra posiblemente refinancia esaki y si por, te hasta haya parti di dje como un ‘regalo’. Aruba no tin e placa aki aworaki (916 miyon florin) segun prome minister pa paga bek na October y como tal tin cu yega na un areglo di pago. Segun e mandatario, Hulanda tabata keda insisti cu e RAFT mester bin, y aki cos tabata ‘pega ainda’. E mandatario a te hasta bisa e tempo ey cu e ta spera cu e siman despues, lo por   a sali afo y cu por anuncia un acuerdo pronto tambe riba e tema aki. Nos ta dos luna mas leu y ainda Hulanda ni sa (segun Van Huffelen) kico e problema ta, pasobra Aruba no a bise ainda. Por scucha e entrevista AKI.